فیصل آباد (عکس آن لائن) محکمہ زراعت نے دھا ن کی فی ایکڑ بہتر پیداوار کے حصول کیلئے محکمانہ سفارشات پر عملدر آمد کی ہدایت کرتے ہوئے،
کہاکہ کاشتکار دھا ن کے کھیتوں سے جڑی بوٹیوں کی تلفی پر خصوصی توجہ مرکوز کریں کیونکہ جڑی بوٹیاں تلف کرنے سے پیداوار میں خاطر خواہ اضافہ اور آبپاشی و کھادوں کے اخراجات میں بھی کمی لائی جا سکتی ہے۔
محکمہ کے ترجمان نے کاشتکاروں کے نام پیغام میں کہا کہ جب کاشتکار دھان کی لاب کھیتوں میں منتقل کردیں تو اس کے تین سے پانچ دن کے اندر اندر جڑی بوٹی مار زہر کا استعمال بھی کرناچاہیے۔
انہوں نے کہا کہ زہر ڈالنے کے بعد اس بات کا بھی خاص خیال رکھا جائے کہ ایک ہفتہ بعد تک دھان کے کھیت سے پانی خشک نہ ہو،
کیونکہ پانی کی خشکی کے باعث ایک طرف زہریں موثر انداز میں اپنا اثر و نفوذ دکھانے سے قاصر رہتی ہیں جبکہ دوسری جانب فصل کو بھی سوکھنے اور نقصان کے خدشات لاحق رہتے ہیں۔
انہوں نے کہا کہ کاشتکار زنک کی کمی دور کرنے کیلئے محکمہ کی مشاورت سے موثر کھادوں کا استعمال کریں .
تاکہ فصل کی بہتر پیداوار حاصل ہو سکے۔انہوں نے بتا یاکہ جو کاشتکار پنیری میں زنک سلفیٹ کا استعمال کر چکے ہیں انہیں لاب کی کھیتوں میں منتقلی کے بعد زنک کی ضرورت نہیں۔
انہوں نے بتا یا کہ اس ضمن میں محکمہ زراعت کی فری ہیلپ لائن 0800-15000 سے بھی استفادہ کیا جا سکتا ہے۔
