عمان(عکس آن لائن)اردن کے فرمانروا شاہ عبداللہ دوم نے خبردار کیا ہے کہ مغربی کنارے اور یروشلم میں اسرائیل کی طرف سے شروع کی گئی کشیدگی قابو سے باہر ہو سکتی ہے جس سے پورا خطہ آتش فشاں بن کرپھٹ سکتا ہے۔
غیرملکی خبررساں ادارے کے مطابق شاہ عبداللہ نے کینیڈا کے وزیر اعظم جسٹن ٹروڈو کے ساتھ فون پر گفتگو کرتے ہوئے زور دیا کہ خطہ اس وقت تک استحکام سے لطف اندوز نہیں ہو گا جب تک کہ فلسطین اسرائیل تنازعہ حل نہیں ہو جاتا۔
انہوں نے مسئلہ فلسطین کے لیے ایک سیاسی افق تلاش کرنے کی ضرورت پر زور دیا تاکہ ایک منصفانہ اور جامع امن کا حصول ممکن بنایا جا سکے اور دو ریاستی فارمولے کے تحت آزاد فلسطینی ریاست کے قیام کی راہ ہموارکی جا سکے۔
انہوں نے غزہ میں فوری جنگ بندی اور شہریوں کے تحفظ کی ضرورت پر بھی زور دیا۔اردن کے بادشاہ نے غزہ میں انسانی اور امدادی امداد کی مناسب اور پائیدار ترسیل کو یقینی بنانے کی کوششوں کو تیز کرنے کی اہمیت اور فلسطینی پناہ گزینوں کے لیے اقوام متحدہ کی ریلیف اینڈ ورکس ایجنسی (UNRWA) کی امداد جاری رکھنے پر بھی زور دیا۔
انہوں نے کہا کہ اونروا کو فلسطینیوں کی امداد جاری رکھنے کے لیے عالمی برادری سے معاونت جاری رکھنے کا مطالبہ کیا۔
