فیصل آباد (عکس آن لائن)ماہرین زراعت نے گندم کی کٹائی کے دوران تھریشر کی رفتار پر خصوصی توجہ دینے کی ہدایت کی ہے اور کہاہے کہ زمیندار ، کاشتکار، کسان گندم کی فصل کے اچھی طرح پک کر تیار اور خشک ہونے پر برداشت کے مراحل میں ضروری ہدایات اور سفارشات پر عملدرآمد یقینی بنائیں ۔
انہوں نے کاشتکاروں کے نام پیغام میں کہاکہ تھریشر تیز چلنے سے گندم کے دانے ٹوٹ جاتے ہیں اور کم رفتار سے دانوں کے ساتھ گندم کے سٹوں کے ٹکڑے بھی نکل آتے ہیں لہٰذا تھریشر کی رفتار کو مناسب رکھنا چاہیے ۔انہوں نے کہاکہ بارش کے دوران گندم کے دانوں کو اچھی طرح ڈھانپ دینا چاہیے اور بیج کو ذخیرہ کرنے سے پہلے دھوپ میں بکھیر کر اچھی طرح خشک کر لینا چاہیے تاکہ دانوں میں نمی کا تناسب 10فیصد سے زیادہ نہ رہے۔
انہوں نے کہاکہ دانوں کو ہمیشہ نئی بوریوں میں ذخیرہ کرنا چاہیے تاہم پرانی بوریوں میں دانے ذخیرہ کرنے سے پہلے بوریاں اچھی طرح جھاڑ لینی چاہئیں ۔ انہوں نے مزید ہدایت کی کہ گودام صاف ستھرے ، روشن اور ہوا دار ہونے چاہئیں اور گوداموں کی چھت ، دیوار ، فرش اور دراڑوں میں موجود درزوں کو بھی اچھی طرح بند کر دینا چاہیے تاکہ اس میں کیڑے مکوڑے پناہ نہ لے سکیں ۔ انہوں نے کہاکہ مذکورہ ہدایات پر عمل کرکے کاشتکار بہتر نتائج حاصل کر سکتے ہیں۔
