پاکستان

پاکستان اور زمبابوے کے مابین ٹیسٹ سیریز کا آغاز آج سے ہوگا

ہرارے (عکس آن لائن)پاکستان اور زمبابوے کے مابین ٹیسٹ سیریز کا آغاز (آج)جمعرات سے ہوگا، دونوں ٹیمیں ہرارے اسپورٹس کلب میں آمنے سامنے ہوں گی،بابر اعظم کی قیادت میں میدان میں اترنے والی پاکستان کرکٹ ٹیم نے آخری مرتبہ ٹیسٹ سیریز جنوبی افریقہ کے خلاف جنوری/فروری میں کھیلی تھی، جہاں پاکستان نے پہلا ٹیسٹ میچ 7 وکٹوں اور دوسرا 95 رنز سے جیتا تھا،اس دوران پاکستان نے وائٹ بال کرکٹ کی چار دو طرفہ سیریز کھیلیں، جس میں تین ٹی ٹونٹی اور ایک ون ڈے فارمیٹ کی سیریز شامل تھیں، یہ چاروں سیریز پاکستان نے جیتیں،جنوبی افریقہ کے خلاف ہوم ٹیسٹ سیریز میں سنچریاں اسکور کرنے والے پاکستان کے دو بیٹسمین، فواد عالم اور محمد رضوان، 29 اپریل سے شروع ہونے والی سیریز میں بھی نمایاں کارکردگی کا مظاہرہ کرنے کی کوشش کریں گے،وکٹ کیپر بیٹسمین محمد رضوان رواں سال بہترین بیٹنگ فارم میں ہیں. وہ اب تک اس سال وائیٹ بال کرکٹ میں سب سے زیادہ رنز بنانے والے بلے باز ہیں،دوسری طرف حال ہی میں عالمی ون ڈے پلئیرز رینکنگ میں دنیا کے پہلے اور ٹی ٹونٹی رینکنگ میں دوسرے بہترین بیٹسمین بننے والے بابر اعظم بھی سیریز میں بہترین کارکردگی کا مظاہرہ کرکے ٹیسٹ کرکٹ کے پانچ بہترین بلے بازوں میں شامل ہونے کی کوشش کریں گے،اس سیریز میں پاکستان کے چوتھے نمایاں بیٹسمین اظہر علی ہوں گے، جو اب تک اپنے ٹیسٹ کیریئر میں زمبابوے اور جنوبی افریقہ کے علاوہ ہر ٹیم کے خلاف سنچری اسکور کرچکے ہیں. 85 ٹیسٹ میچز میں 6417 رنز بنانے والے اظہر علی کے پاس زمبابوے کے خلاف ٹیسٹ کرکٹ میں سنچری بنانے کا یہ بہترین موقع ہے،باؤلنگ کے شعبے میں، شاہین شاہ آفریدی اور حسن علی بھی میزبان ٹیم کے خلاف نمایاں کارکردگی کا مظاہرہ کرنے کی کوشش کریں گے حسن علی نے جنوبی افریقہ کے خلاف آخری ٹیسٹ میچ میں 114 رنز کے عوض 10 وکٹیں حاصل کی تھیں، اس کامیابی کی بدولت انہیں پلیئر آف دی میچ کا ایوارڈ دیا گیا تھا وہ اس وقت ٹیسٹ کرکٹ کی عالمی رینکنگ میں 35ویں اور شاہین شاہ آفریدی 33ویں نمبر پر ہیںجنوبی افریقہ کو ہوم ٹیسٹ سیریز میں 0ـ2 سے شکست دینے والی پاکستان کرکٹ ٹیم فی الحال آئی سی سی ٹیسٹ رینکنگ میں پانچویں پوزیشن پر موجود ہے،

پاکستان کے ریٹنگ پوائنٹس کی تعداد 90 ہے، پوائنٹس ٹیبل پر بھارت (120) کا پہلا، نیوزی لینڈ (118) کا دوسرا، آسٹریلیا (113) اور انگلینڈ (106) کا چوتھا نمبر ہے،اگر پاکستان زمبابوے کے خلاف دونوں ٹیسٹ میچز جیت جاتا ہے تو اسے صرف ایک ریٹنگ پوائنٹ ملے گا تاہم وہ 91 پوائنٹس کے ساتھ پانچویں نمبر پر ہی موجود رہے گا، اگر پاکستان سیریز میں 0ـ1 سے کامیابی حاصل کرتا ہے تو اس کا ایک پوائنٹ کم ہوجائے گا اور وہ 89 پوائنٹس کے ساتھ جنوبی افریقہ کے برابر آجائے گا تاہم اس صورت میں وہ ایک درجہ تنزلی کے ساتھ چھٹی پوزیشن پر پہنچ جائے گا. سیریز 1ـ1 سے برابر ہونے کی صورت میں پاکستان کے پانچ ریٹنگ پوائنٹس کم ہوجائیں گے،زمبابوے کی ٹیم فی الحال آئی سی سی ٹیسٹ رینکنگ میں 29 ریٹنگ پوائنٹس کے ساتھ 10ویں نمبر پر موجود ہے،دونوں ٹیموں کے درمیان اب تک 8 ٹیسٹ سیریز کھیلی جا چکی ہیں، زمبابوے نے صرف ایک مرتبہ پاکستان کو، 1998 میں، کسی ٹیسٹ سیریز میں شکست دی تھی.

یہ واحد موقع تھا جب ارباب نیاز اسٹیڈیم پشاور میں کھیلے گئے ٹیسٹ میچ میں نو وکٹوں سے فتح حاصل کرنے والی زمبابوے کرکٹ ٹیم نے پاکستان کو تین میچوں کی سیریز میں 0ـ1 سے شکست دی تھی اس دوران دونوں ٹیموں کے مابین کھیلے گئے 18 ٹیسٹ میچز میں سے پاکستان نے 10 اور زمبابوے نے تین جیتے ہیں جبکہ چار ٹیسٹ میچز ڈرا اور ایک نامکمل ختم ہوا آخری مرتبہ پاکستان اور زمبابوے کی ٹیمیں 2013 میں زمبابوے میں ہی مدمقابل آئی تھیں، دونوں ٹیموں کے مابین یہ سیریز 1ـ1 سے برابر رہی تھی، دلچسپ بات یہ ہے کہ اس سیریز میں پاکستان کی قیادت کرنے والے مصباح الحق اب قومی کرکٹ ٹیم کے ہیڈ کوچ اور سینئر کھلاڑی یونس خان اب قومی ٹیم کے بیٹنگ کوچ ہیں،سیریز کے پہلے ٹیسٹ میچ میں ناقابل شکست ڈبل سنچری بنانے والے یونس خان نے اس سیریز میں 319 رنز بنائے تھے،مصباح الحق نے 72 سے زائد کی اوسط سے سیریز میں 217 رنز بنائے تھے۔

اپنا تبصرہ بھیجیں