فیصل آباد (عکس آن لائن):محکمہ زراعت نے گندم کے کاشتکاروں کو ہدائت کی ہے کہ دھان، کپاس، مکئی اور کماد کے بعد کاشتہ فصل کو دوسرا پانی 80سے 90دن بعد اور پچھیتی کاشت کیلئے پہلا پانی شاخیں نکلتے وقت بوائی کے 20سے 25دن بعد جبکہ دوسرا پانی 70سے 80دن بعد گوبھ کے وقت اور تیسرا پانی 110سے 115دن بعد دانے کی دو دھیا حالت میں دیا جائے۔اسسٹنٹ ڈائریکٹر محکمہ زراعت توسیع فیصل آبادخالد اقبال نے کہا کہ گندم کی اچھی پیداوار حاصل کرنے کیلئے جڑی بوٹیوں کی تلفی انتہائی ضروری ہے۔ انہوں نے کہا کہ ایک اندازے کے مطابق جڑی بوٹیوں کی وجہ سے 14سے42فیصد پیداوار کم ہو جاتی ہے اور اگر جڑی بوٹیوں کی بر وقت تلفی کر دی جائے تو پیداوار میں 15فیصد تک اضافہ ہو جاتا ہے۔
انہوں نے کہا کہ پہلی آبپاشی کے بعد کھیت وتر حالت میں آنے پر دوہری بار ہیرو چلائیں۔ جڑی بوٹی مار زہروں کے سپرے کیلئے 100سے120لیٹر پانی فی ایکڑ استعمال کریں اور سپرے صاف اور خوشگوار موسم میں کی جائے۔ دھند، بارش اور تیز ہواکی صورت میں سپرے ہر گز نہ کریں اور خیال رکھا جائے کہ دوران سپرے فصل کا کوئی حصہ دوہری بار سپرے نہ ہو اور کوئی حصہ سپرے سے رہ بھی نہ جائے۔
