ممبئی(عکس آن لائن) بالی ووڈ اداکارہ رشمیکا مندانا کی جعلی غیر اخلاقی ویڈیو وائرل ہونے پر بھارتی حکومت نے سوشل میڈیا کیلئے ایڈوائزری جاری کردی۔
بھارتی وزارت الیکٹرونکس اور انفارمیشن ٹیکنالوجی کی جانب سے سوشل میڈیا کیلئے جاری نئی ہدایات میں کہا گیا ہے کہ سوشل میڈیا کے جو بھی پلیٹ فارمز ڈیپ فیک ویڈیوز بنائیں گے یا پھیلائیں گے ان کو قانونی کارروائی اور جرمانوں کا سامنا کرنا پڑے گا۔ایڈوائزری کے مطابق کمپیوٹر اور دیگر کمیونیکیشن آلات کو استعمال کرکے جعلی ویڈیوز بنانے اور پھیلانے والوں کو 3سال قید اور ایک لاکھ روپے تک جرمانہ ہوسکتا ہے۔بھارتی حکومت کی جانب سے نئی ہدایات اداکارہ رشمیکا مندانا کی ایک جعلی غیر اخلاقی ویڈیو وائرل ہونے کے بعد سامنے آئی ہیں۔
اداکارہ نے جعلی ویڈیو کو انتہائی خوف زدہ کرنے والا عمل قرار دیا تھا۔امیتابھ بچن سمیت دیگر بالی ووڈ اسٹارز اور مختلف شعبوں سے تعلق رکھنے والے افراد نے رشمیکا مندانا کی جعلی ویڈیو بنانے والوں کے خلاف کارروائی کے ساتھ ساتھ مصنوعی ذہانت اور ٹیکنالوجی کے غلط استعمال کو روکنے کے لیے سخت اقدامات کرنے کا مطالبہ کیا تھا۔
