ملتان (عکس آن لائن):محکمہ زراعت کے ماہرین نےکہا ہے کہ کماد کی ستمبر کاشت کے لیے موزوں وقت یکم سے 30ستمبر ہے کماد کی اچھی پیداوار حاصل کرنے کے لیے میرا اور بھاری میرا زمین جس میں پانی کا نکاس بہتر ہو اور نامیاتی مادہ کافی مقدار میں پایا جاتا ہو موزوں رہتی ہے۔ سیم اور تھور والی زمینیں کماد کی کاشت کے لیے موزوں نہیں تاہم کماد کو ہلکی اور کمزور زمین میں بھی مناسب دیکھ بھال سے کاشت کیا جا سکتا ہے۔ترجمان محکمہ زراعت نے مزید بتایا کہ کماد کی جڑیں زمین کے اندر کافی گہرائی تک جاتیں ہیں اس لیے کم از کم ایک فٹ گہرائی تک زمین کا تیار ہونا ضرروی ہے کماد کی جڑوں کے مناسب پھیلا اور خوراک کے آسان حصول کے لیے زمین نرم، بھربھری اور ہموار ہونی چاہے،زمین کی تیاری گہرا ہل چلا کر کریں اورتیاری سے پہلے اچھی طرح گلی سڑی گوبر کی کھاد ڈالیں۔روٹاویٹردو دفعہ، چزل ہل ایک دوسرے مخالف رخ اور3سے4 دفعہ عام ہل بمعہ سہاگہ سے زمین تیار کریں۔کاشتکار کماد کی بہتر پیداوار کے لئے محکمہ زراعت کی منظورشدہ اقسام علاقائی تقسیم کے لحاظ سے کاشت کریں۔
کماد کی اگیتی پکنے والی اقسام میں سی پی400۔77سی پی ایف237،ایچ ایس ایف242،سی پی ایف250،سی پی ایف251،درمیانی پکنے والی اقسام میں ایس پی ایف213-،ایس پی ایف234-،ایچ ایس ایف240-،سی پی ایف246-،سی پی ایف247-،سی پی ایف248-،سی پی ایف249-،سی پی ایف253-،سی پی ایس جی2525،ایس ایل ایس جی1283-پچھیتی پکنے والی اقسام میں سی پی ایف252شامل ہیں۔کاشتکارکوبروقت کاشت اور دیگر موزوں حالات میں دو آنکھوں والے 30 ہزار سمے یا تین آنکھوں والے 20 ہزار سمے فی ایکڑ ڈالنے چاہئیں یہ تعداد موٹی اقسام میں تقریبا 100 سے 120 من اور باریک اقسام میں 80 سے 100 من بیج سے حاصل کی جا سکتی ہے۔ کاشت میں تاخیر ہونے کی صورت میں بیج کی مقدار میں 20 سے 25 فیصدتک اضافہ کر لینا چاہیے۔ کماد کی کاشت کے لیے زمین کی تیاری گہرے ہل (چزل) سے کریں پھر عام ہل چلا کر سہاگہ دیں اور رجر کے ذریعے 4فٹ کے فاصلہ پر 8 سے 10 انچ گہری کھیلیاں بنائیں ان کھیلیوں میں پہلے فاسفورس اور پوٹاش کھاد ڈالیں اور پھر بیج ڈال کر مٹی کی ہلکی سی تہ سے ڈھانپ دیں۔
