اسلام آباد (عکس آن لائن) متحدہ عرب امارات کوپاکستانی برآمدات میں گزشتہ سال کے دوران 16.96 فیصد
اضافہ ریکارڈکیا گیاہے۔ سٹیٹ بینک کے اعدادوشمارکے مطابق گزشتہ مالی سال کے پہلے 11 ماہ میں متحدہ
عرب امارات کو1.462 ارب ڈالر مالیت کی برآمدات کی گئی جو مالی سال 2018-19ء کی اسی مدت کے مقابلے
میں 16.96 فیصد زیادہ ہے ،مالی سال 2018-19ء کی اسی مدت میں متحدہ عرب امارات کو 1.250 ارب ڈالر
مالیت کی برآمدات کی گئی تھی۔گزشتہ مالی سال میں صرف دبئی کوبرآمدات کا حجم 1.172 ارب ڈالر رہا،
پیوستہ مالی سال میں دبئی کیلئے پاکستانی برآمدات کا حجم 1.017 ارب ڈالرریکارڈکیا گیاتھا۔ابوظہبی کو
گزشتہ مالی سال کے پہلے 11 ماہ میں 119.21 ملین ڈالر، شارجہ کو 120.37 ملین ڈالر، راس الخیمہ
کو82.64 ملین ڈالر اورفجیرہ کو 57.29 ملین ڈالرکی برآمدات ریکارڈ کی گئی۔ اسی طرح عجمان
کو36.13 ملین ڈالرکی برآمدات کی گئی۔
