کوئٹہ(نمائندہ عکس ) وزیر اعلی بلوچستان میر عبدالقدوس بزنجو نے کہا کہ ریکوڈک منصوبے کو سیاست کی نذر نہیں ہونے دیں گے، اٹھارہویں ترمیم کے تحت صوبے کو حاصل اختیار سے پیچھے ہٹنا گناہ سمجھتے ہیں۔ وزیراعلی بلوچستان میر عبدالقدوس بزنجو نے میڈیا سے بات چیت کرتے ہوئے کہا کہ ہم نے دن رات کی محنت حتی کہ وزیراعلی کی کرسی کو بھی دا وپر لگا کر ریکوڈک منصوبے کو بلوچستان کے حق میں بنایا ہے، ریکوڈک منصوبے کو سیاست کی نظر نہیں ہونے دیں گے، ریکوڈک منصوبے سے اربوں ڈالر پاکستان آئیں گے، 8 ارب ڈالر کی غیر ملکی سرمایہ کاری کا یہ منصوبہ پاکستان کی معیشت میں تازہ خون کی طرح دوڑے گا۔ انہوں نے کہا کہ یہ بات روز روشن کی طرح سب پر عیاں ہے کہ ملک اور صوبے کے مفاد میں اس سے بہتر معاہدہ نہیں ہو سکتا تھا، ہم نے اللہ کے فضل سے ناممکن کو ممکن بنا کر دکھایا ہے، سابق وزیراعظم عمران خان اور سابق وزیر خزانہ شوکت ترین کے لئے ہمارا اٹل مقف حیران کن تھا، شروع دن سے عہد کیا تھا کہ صوبے کے مفاد سے ایک انچ پیچھے نہیں ہٹیں گے۔
میر عبدالقدوس بزنجو کا کہنا تھا کہ ہر ہر قدم پر صوبائی اسمبلی، سیاسی قائدین اور کابینہ کو آن بورڈ رکھا۔ اسمبلی قرار داد پر اپوزیشن کو مطمئن کریں گے۔ سب کو ساتھ لے کر چلنے پر پہلے بھی یقین رکھتے تھے اور اب یقین ہے۔ گزشتہ روز بھی اپوزیشن کے رہنماں کو قرار داد کے حوالے بریفنگ دی، معاہدے کے اس مرحلے پر اختلاف رائے کسی طور صوبے کے مفاد میں نہیں۔ وزیر اعلی بلوچستان نے مزید کہا کہ ہم نے نہ تو اپنا کوئی اختیار وفاقی حکومت کو دیا اور نہ کسی صوبائی ٹیکس کی معافی دی، وفاقی حکومت نے ریکوڈک منصوبے پر اپنے ٹیکسوں کی چھوٹ دی لیکن تمام صوبائی ٹیکس نافذ العمل رہیں گے، اٹھارہویں ترمیم کے تحت صوبے کو حاصل اختیار سے پیچھے ہٹنا گناہ سمجھتے ہیں اور اس کا سوچ بھی نہیں سکتے۔
