اسلام آباد (عکس آن لائن) وفاقی وزیربرائے ہوا بازی غلام سرور خان نے کہا ہے کہ
پاکستان تحریک انصاف میں کوئی گروپ بندی نہیں ،فواد چوہدری کی سرزنش ہوئی ہے ،
فواد چودھری کو بات کابینہ میں کرنی چاہیے تھی اورباہرایسا انٹرویو نہیں دینا چاہیے تھا،
وزیراعظم عمران خان کی شخصیت کو چیلنج نہیں کیا جاسکتا ہے،جس کی کار کر دگی بہتر نہیں ہوگی اس کو جانا ہوگا ،
اہم قومی فیصلوں میں شامل افراد کو اپنے اثاثے ظاہر کرنے چاہئیں،انشا اللہ آنے والا سال پاکستان کے لیے بہتری کا سال ہو گا۔
ایک انٹرویومیں انہوں نے کہا کہ طیارہ حادثے کی ابھی عبوری انکوائری رپورٹ پیش کی ہے،
یہی وجہ ہے کہ ابھی کسی پہ طیارہ حادثے کی ذمہ داری نہیں ڈالی گئی ہے۔
انہوں نے کہا کہ حتمی انکوائری رپورٹ میں ہی اصل ذمہ داروں کا تعین کیا جائے گا۔
وفاقی وزیربرائے ہوابازی غلام سرور خان نے کہا کہ وزیراعظم عمران خان نے فوری ایکشن لینے کا کہا ہے،
انہوں نے یقین دہانی کرائی کہ ذمہ داروں کے خلاف کارروائی ہو گی۔انہوں نے واضح کیا کہ صرف پائلٹس کے خلاف ایکشن نہیں ہو گا،
ان کے خلاف بھی کارروائی ہوگی جو سارے معاملے میں ملوث پائے جائیں گے۔
ایک سوال کے جواب میں وفاقی وزیر نے کہا کہ ہم کسی کے دباؤ میں نہیں آئیں گے اور ایکشن لیا جائے گا۔
وفاقی وزیربرائے ہوا بازی غلا سرور خان نے واضح کیا کہ کسی فرد واحد پر کوئی اعتراض نہیں تھا۔
ان کا کہنا تھا کہ اہم قومی فیصلوں میں شامل افراد کو اپنے اثاثے ظاہر کرنے چاہئیں۔
غلام سرورخان نے کہا کہ کسی کو کسی نے نہیں نکلوایا۔ انہوں نے زور دے کرکہا کہ فواد چودھری کو بات کابینہ میں کرنی چاہیے تھی
اورباہرایسا انٹرویو نہیں دینا چاہیے تھا۔وفاقی وزیر برائے ہوا بازی نے دعویٰ کیا کہ کابینہ اجلاس میں فواد چودھری کی سرزنش ہوئی ہے۔
انہوں نے کہا کہ جس کی کارکردگی بہتر نہیں ہو گی اس کو جانا ہو گا۔
انہوںنے کہاکہ وزیراعظم عمران خان کی شخصیت کو چیلنج نہیں کیا جاسکتا ہے۔
غلام سرور خان کا ملک کی معاشی صورتحال پر کہنا تھا کہ لیے گئے قرضوں کا سود ادا کرنے کے لیے مزید قرضے لینے پڑے ہیں .
تاہم انہوںنے کہاکہ انشا اللہ آنے والا سال پاکستان کے لیے بہتری کا سال ہو گا۔
انہوں نے کہا کہ پاکستان تحریک انصاف کی حکومت اپنے پانچ سال پورے کرے گی۔
وفاقی وزیربرائے ہوا بازی غلام سرو خان نے کہا کہ امریکہ میں کورونا کے باعث ایک لاکھ سے زائد اموات ہو چکی ہیں۔
