میرپور خاص(نمائندہ عکس ) وزیر خارجہ شاہ محمود قریشی نے کہا ہے کہ تحریک انصاف میں کوئی ترین گروپ نہیں، پی ٹی آئی میں صرف عمران خان کا ہی گروپ ہے، ہمارے ارکان اسمبلی اپنے موقف پر ڈٹے رہیں گے، ہمارا واضح موقف ہے کہ جنگ مسائل کا حل نہیں، ہم 20 سال حالت جنگ میں رہے، ہمارے جوانوں نے قربانیاں دیں۔
میرپور خاص میں میڈیا سے گفتگو کرتے ہوئے وزیر خارجہ شاہ محمود قریشی نے کہا کہ کسی کے بہکاوے میں نہیں آئیں گے، زر اور زرداری کی طاقت کسی کو نہیں خرید سکے گی۔ انہوں نے کہا کہ مٹیاری میں پی پی کے کارکنوں نے میرے قافلے کو روکنے کی کوشش کی، پیپلزپارٹی کارکنوں نے تصادم کی فضا پیدا کرنے کی کوشش کی، یہ شہید بی بی کی پارٹی کا شیوہ نہیں، یہ نئی پیپلزپارٹی ہے، پارلیمنٹ کو وزیراعظم عمران خان پر مکمل اعتماد ہے۔ شاہ محمود قریشی کا کہنا تھا کہ اپوزیشن عدم اعتماد کر رہی ہے، میدان میں آئے، وزیراعظم نے مشکل حالات میں پٹرول اور بجلی پر ریلیف دیا، یقین ہے ہمارے ارکان اسمبلی اپنے موقف پر ڈٹے رہیں گے، ڈائیلاگ اور ڈپلومیسی کے کل بھی پابند تھے آج بھی اس کے قائل ہیں۔
انہوں نے کہا کہ ہمارا واضح موقف ہے کہ جنگ مسائل کا حل نہیں، ہم 20 سال حالت جنگ میں رہے، ہمارے جوانوں نے قربانیاں دیں۔
