واشنگٹن(عکس آن لائن) امریکی وزیرخارجہ مائیک پومپیو نے کہا ہے کہ امریکا ایران کو اسلحہ کے
حصول پرعاید پابندی میں توسیع کے لیے کام کررہا ہے۔
عرب ٹی وی کے مطابق ایک پریس کانفرنس سے خطاب میں امریکی وزیرخارجہ نے کہا ،
کہ ایران پر اسلحہ کے حصول پر عاید کی گئی پابندی کا خاتمہ دہشت گرد ملیشیاؤں کے لیے اچھی خبر ہوگی ،
کیونکہ ایرانی وہ اسلحہ اپنے وفادار دہشت گرد عناصر کو فراہم کرے گا۔
ان کا کہنا تھا کہ ایران کو دہشت گردی کے لیے فنڈز فراہم کرنے کی تجویز ناقابل قبول ہے۔
انہوں نے کہا کہ پوری دنیا کو یہ جان لینا چاہیے، کہ ایران کو اسلحہ کی فراہمی کے خطرناک نتائج
کا سامنا کرنا پڑ سکتا ہے۔ ان کا کہنا تھا کہ مناسب وقت آنے پر امریکا ایران کے ساتھ بات چیت کرے گا .
مگر ایران کو اسلحہ کے حصول میں کسی قسم کی ڈھیل نہیں دی جاسکتی۔
امریکی وزیر خارجہ کا کہنا تھا کہ وہ اپنے اتحادیوں اور دوست ممالک کے
ساتھ ایران کو اسلحہ کی فراہمی پرعاید کردہ پابندی میں توسیع کے لیے صلاح مشورہ کررہے ہیں۔
امریکی وزیرخارجہ نے کہا کہ ایران ایک بدمعاش ریاست ہے .
جو عالمی جوہری توانائی ایجنسی کے معائنہ کاروں کو اپنی مشکوک
جوہری تنصیبات تک رسائی دینے سے مسلسل انکار کرکے ہٹ دھرمی کا مظاہرہ کررہا ہے۔
انہوں نے ایران پر زور دیا کہ وہ بدمعاشی چھوڑ کر جوہری توانائی ایجنسی کے ساتھ تعاون کرے۔
