جس مائی کے لعل میں ہمت ہے وہ اسمبلی جانے سے روک کر دکھادے، شاہد خاقان عباسی

اسلام آباد (نمائندہ عکس)سابق وزیراعظم شاہد خاقان عباسی نے حکومت کو 10لاکھ لوگ ڈی چوک میں لانے کے بجائے 172 ارکان ایوان میں پورے کرنے کا مشورہ دیتے ہوئے کہا ہے کہ جس مائی کے لعل میں ہمت ہے وہ اسمبلی جانے سے روک کر دکھادے۔

احتساب عدالت کے باہر میڈیا سے گفتگو کرتے ہوئے مسلم لیگ (ن)کے رہنماء شاہد خاقان عباسی نے کہا کہ ضرور 10لاکھ لوگ لائیں تاہم وہ عدم اعتماد کے ووٹ کو نہیں روک سکتے،جب آدمی کے پاس کچھ نہ رہے تو وہ گالم گلوچ پر اتر آتا ہے، وزیراعظم تو پہلے ہی اس پر اتر آئے ہیں، یہ دھمکیاں آپ کو مہنگی پڑیں گی۔شاہد خاقان عباسی نے کہا کہ جس مائی کے لعل میں ہمت ہے وہ اسمبلی جانے سے روک کر دکھا دے ،آپ کودھمکیاں مہنگی پڑیں گی ،عوام کی آواز کو جو روکے گا اس کو جواب ملے گا،جو حکومت سڑکوں کا رخ کرے وہ ناکام ہو چکی ہوتی ہے۔

مسلم لیگ (ن)کے رہنماء نے کہا کہ ہمارے کچھ ممبران کو نیب کی طرف سے نوٹس آئے ہیں نیب کو بتانا چاہتا ہوں آپ کو اس کا جواب دینا پڑیگا، نیب کا کام تحریک عدم اعتماد میں مداخلت کرنا نہیں ہے۔سابق وزیراعظم شاہد خاقان عباسی نے اہلکاروں کو متنبہ کرتے ہوئے کہا کہ جو اہلکار بھی حکومت کے اوچھے ہتھکنڈوں کا آلہ کار بنے بنے گا،وہ اپنے کیئے کا ذمہ دار ہو گا۔