واشنگٹن(عکس آن لائن)امریکی وزیر دفاع مارک ایسپرنے کہا ہے کہ کرونا کی ویکسین کی تیاری میں ایک سال سے ڈیڑھ سال کا عرصہ لگ سکتا ہے۔ایسپرنے کہا کہ کچھ نجی کمپنیاں جلد ایک ویکسین تیار کرنے کی توقع کرتی ہیں۔
ایسپر نے وزارت دفاع(پینٹاگان)کے دیگر ملازمین اور اپنے نائب سمیت خود کو کرونا کے شبے میں الگ کردیا تھا۔ ان کا کہنا تھا کہ کرونا وائرس کی روک تھام کیلئے مصنوعی آکسیجن کے ایک ہزار آلات فراہم کیے گئے ہیں۔پینٹاگان کے ترجمان جوناتھن ہافمین نے ایک پریس بریفنگ میں کہا تھا ہم وزیر دفاع کو قرنطینہ منتقل کرنے کی کوشش کررہے ہیں۔ان کا کہنا تھا کہ مارک ایسپر سے ملاقاتیوں کی تعداد کم کی جا رہی ہے۔
ترجمان کا کہنا تھا کہ امریکی فوج میں کرونا کے متاثرہ اہلکاروں کی تعداد 18ہوگئی ہے۔ گذشتہ ہفتے اس میں 10نئے کیسز کااضافہ ہوا۔قابل ذکر ہے کہ امریکا میں کرونا کے متاثرین کی تعداد 4275تک پہنچ گئی ہے حالیہ ایام میں 739واقعات میں اضافہ ہوا ہے جبکہ اموات کی تعداد 75 ہوگئی ہے۔
