لاہور (عکس آن لائن ) ترجمان مسلم لیگ ن مریم اورنگزیب نے کہا ہے کہ ڈسکہ الیکشن سے یہ بات بھی درست ثابت ہوئی کہ ڈسکہ الیکشن میں دھاندلی اور حکومتی غنڈہ گردی کے خلاف الیکشن کمیشن کے تاریخی فیصلے اور اس پر سپریم کورٹ کی مہر نے ڈیٹرنس کا کام کیا ہے۔
اپنے ایک بیان میں مریم اورنگزیب کہا کہ یہ فیصلہ صرف ڈسکہ کے ری پول کا نہیں تھا بلکہ آئندہ آنے والے ہر الیکشن کی شفافیت اور غیر جانبداری کا تھا، یہی وجہ ہے کہ ڈسکہ میں الیکشن کمیشن نے شفاف انتخابات کی آئینی اور قانونی ذمہ داری احسن انداز سے انجام دی اور کسی ووٹ چور کی ووٹ کے ڈبے کو ہاتھ لگانے کی اجازت نہ دی۔ مریم اورنگزیب کا مزید کہنا تھا کہ گزشتہ روز ہونے والے ضمنی الیکشن میں آر ٹی ایس بٹھانے، ووٹ اور الیکشن کمیشن کے عملے کو چوری کرنے اور عوام کے مینڈیٹ پر شب خون مارنے کی جرات نہ ہو سکی۔
