کراچی (عکس آن لائن)پاکستان کرکٹ ٹیم کے وکٹ کیپر بیٹر محمد رضوان نے میچ کے دوران اور میچ کے بعد حریف ٹیم کے کھلاڑیوں سے تعلقات کے حوالے سے انکشاف کیا ہے کہ جب ہم بطور کھلاڑی میدان میں اترتے ہیں تو ہم مختلف حربے اپناتے ہیں، واپس آتے ہیں تو فیملی کی طرح ہوتے ہیں ۔بھارتی میڈیا رپورٹس کے مطابق دوران گفتگو رضوان نے میچ میں اپنائی جانے والی حکمت عملی پر بات کرتے ہوئے کہا کہ جب ہم بطور کھلاڑی میدان میں اترتے ہیں تو ہم مختلف حربے اپناتے ہیں، جیسے مخالف کو گھورنا، حریف کھلاڑی پر جملے کسنا ، پرجوش انداز میں خوش ہونا لیکن جب ہم کھیل کے بعد واپس آتے ہیں تو ہم یہ نہیں کہتے کہ ہم کس ملک سے تعلق رکھتے ہیں بلکہ ہم سب ایک فیملی کی طرح ہوتے ہیں۔
رضوان نے کہا کہ ہم آسٹریلیا اور بھارت جیسی مختلف ٹیموں کے حوالے سے مختلف احساسات اور جذبات رکھتے ہیں لیکن میدان میں ہم انھیں صرف شکست دینے کا عزم رکھ کر اترتے ہیں، اس کے علاوہ ہمارے پاس کوئی اور آپشن نہیں ہوتا لیکن میدان سے باہر ہم ایک دوسرے کا احترام اور عزت ہی نہیں بلکہ ایک دوسرے کے لیے دل میں محبت بھی رکھتے ہیں۔رضوان نے اس بات پر اتفاق کیا کہ دوستی کے باوجود کھلاڑی کا مقصد میدان میں صرف کھیل جیتنا ہوتا ہے، دوستی کا مقصد یہ نہیں ہوتا کہ ہم حریف کھلاڑی کیلئے رنز بنانا آسان کر دیں، میدان میں ہمارا مقصد صرف اور صرف جیت ہوتی ہے۔انھوں نے کہا کہ مختلف میچز کے بعد حریف کھلاڑیوں کو بھی( پاکستانی کھلاڑیوں کو دھونی اور ویرات کوہلی سے بات چیت) گفتگو کرتے دیکھا گیا ہے، یہ اسی ذہنیت کے تحت کی جاتی ہے کیوں کہ میچ کے بعد ہم سب ایک خاندان کی طرح ہوتے ہیں۔
