لاہور (عکس آن لائن ) لاہور ہائیکورٹ میں فرح شہزادی کے بچوں کا نام ای سی ایل سے نکالنے کے لئے انٹرا کورٹ اپیل پر سماعت ہوئی، ایف آئی اے نے عدالت میں جواب جمع کروا دیا۔
جسٹس شہرام سرور چوہدری کی سربراہی میں دو رکنی بینچ نے اپیل پر سماعت کی۔دوران سماعت ایف آئی اے نے بتایا کہ غیر قانونی جائیدادیں بچوں کے نام پر رجسٹر ہیں، بچوں کے نام جائیدادیں ہونے کے باعث ای سی ایل شامل کیے گئے ہیں۔
فرح شہزادی کے بچوں فراز اقبال اور ایمان اقبال کی وکیل نے دلائل دیتے ہوئے موقف اختیار کیا کہ سنگل بینچ نے حقائق کا درست جائزہ نہیں لیا، فرح شہزادی کے بچوں کے نام پاسپورٹ کنٹرول لسٹ میں ہیں۔وکیل نے استدعا کی کہ عدالت دونوں بچوں کے نام ای سی ایل سے نکالنے کا حکم دے۔
سرکاری وکیل نے عدالت کو بتایا کہ دونوں کے نام اینٹی کرپشن اسٹیبلشمنٹ نے محکمہ داخلہ کو دیئے تھے۔ جس پر عدالت نے کہا کہ درخواست گزار کوئی پبلک آفس ہولڈر نہیں ہیں۔عدالت نے ایف آئی کو کہا کہ آپ انویسٹی گیشن کریں بچوں کے نام پر کونسی جائیدادیں ہیں، عدالت نے درخواست گزار کو جواب الجواب جمع کروانے کی ہدایت بھی کر دی۔
