لاہور (نمائندہ عکس ) لاہور ہائی کورٹ نے آئی پی پیز کو رقم کی عدم ادائیگی کے کیس کا تحریری حکم جاری کرتے ہوئے نیپرا کے 28 اپریل کے نوٹیفیکیشن پرعمل درآمد معطل کردیا۔ عدالت نے وفاقی حکومت، نیپرا اور دیگر فریقین کو نوٹس جاری کرتے ہوئے جواب طلب کر لیا۔نیپرا کے نوٹیفیکیشن میں درخواست گزار کمپنیوں کو حکومتی لیب سے بجلی کے معیار کا ٹیسٹ کروانے کا پابند کیا گیا تھا۔
لاہور ہائی کورٹ کے جسٹس شاہد کریم نے نجی کمپنی کی درخواست پر سماعت کی۔ درخواست گزار کے وکیل کا کہنا تھا کہ ان کی کمپنی سمیت دیگر پاور کمپنیاں حکومت کو بجلی فراہم کرتی ہیں جو بجلی سپلائی سے قبل اسکا معیار اپنی لیبارٹریوں سے چیک کرواتی ہیں۔
اب حکومت نے رقوم کی ادائیگیوں کی بجائے ان کو بجلی سپلائی سے قبل ٹیسٹ کروانے کا پابند کر دیا ہے۔ درخواست گزار کے وکیل نے عدالت سے نیپرا کے نوٹیفیکیشن پر عمل درآمد معطل کرنے کی استدعا کی جس پرعدالت نے نیپرا کے نوٹیفیکیشن پرعمل درآمد معطل کرنے کا حکم دیا۔
