لاہور (عکس آن لائن ) قومی کرکٹ ٹیم کے سابق آل رائونڈر عبدالرزاق نے پاکستان کرکٹ بورڈ سے راہیں جدا کرلیں۔پی سی بی نے گزشتہ سیزن میں عبدالرزاق کو سینٹرل پنجاب کا ہیڈ کوچ تعینات کردیا گیا تھا، حالیہ سیزن میں سینٹرل پنجاب کی ٹیموں کی سلیکشن کے معاملے پر آل رائونڈر تنقید کی زد میں آئے تھے اور پاکستان جونیئر لیگ کی سلیکشن کے معاملے پر بھی عبدالرزاق پر کئی اعتراضات سامنے آئے تھے۔پاکستان جونیئر لیگ میں حیدر آباد ٹیم کے ساتھ ذمہ داریاں نبھاننے کے بعد عبدالرزاق سینٹرل پنجاب ٹیم کو جوائن نہیں کیا، سابق کرکٹر نے پاکستان جونیئر لیگ کی ٹیم حیدر آباد کے ہیڈ کوچ کے فرائض سرانجام دیئے تھے۔مصباح الحق اور وقار یونس کے کوچنگ سے مستعفی ہونے کے بعد عبدالرزاق کو ایک سیریز کے لئے عبوری بائولنگ کوچ بھی مقرر کیا گیا تھا۔
پی سی بی ذرائع نے عبدالرزاق کے مستعفی ہونے کی تصدیق کرتے ہوئے کہا کہ سابق آل رائونڈر نے مختلف نجی چینلز کے ساتھ مصروفیات کے باعث استعفیٰ دیا، پی سی بی میڈیا پالیسی کے تحت بورڈ کا کوئی ملازم میڈیا پر کام نہیں کرسکتا۔ذرائع نے کہا کہ عبد الرزاق میڈیا پر کام کرنے کے خواہشمند تھے اسی بنا پر وہ مستعفی ہوئے۔واضح رہے کہ سابق کرکٹر کو 46ٹیسٹ، 265ون ڈے انٹرنیشنل اور 32ٹی ٹونٹی انٹرنیشنل میں پاکستان کی نمائندگی کا اعزاز حاصل ہے۔ عبدالرزاق ڈھائی سال سے پی سی بی کوچنگ اسٹاف کا حصہ تھے۔
