دمشق (عکس آن لائن) شام کے شمال مغربی صوبہ ادلب میں صدر بشارالاسد کی فوج اور باغی گروپوں کے درمیان جھڑپوں میں گذشتہ 48 گھنٹے میں 120 سے زیادہ افراد ہلاک ہوگئے۔برطانیہ میں قائم شامی رصدگاہ برائے انسانی حقوق نے کہا ہے کہ ادلب میں نئی جھڑپیں اتوار کو شروع ہوئی تھی۔اس میں شامی حکومت کے 54 فوجی اہلکار مارے گئے ہیں اور مسلح حزب اختلاف اور شہریوں کی 53 ہلاکتیں ہوئی ہیں۔
ادلب کے مختلف علاقوں پر روس کے لڑاکا طیاروں نے بھی بمباری کی ہے جس کے نتیجے میں 15 افراد مارے گئے ہیں جبکہ شامی شہری اسدی فوج کی ادلب کو بارودی سرنگوں سے پاک کرنے کے لیے اس نئی کارروائی کے بعد ہزاروں کی تعداد میں نقل مکانی کرگئے ہیں۔ صوبہ ادلب کے جنوب میں واقع دیہات اور قصبوں سے لوگ ٹرکوں ، کاروں اور موٹر سائیکلوں کے ذریعے اپنی اشیائے ضروریہ کے ساتھ محفوظ مقامات کی جانب جارہے ہیں۔واضح رہے کہ فوج اور مسلح گروپ کے درمیان گذشتہ جمعہ اور ہفتہ کو جھڑپوں میں کم سے کم 70 افراد ہلاک ہوگئے تھے۔
