ملتان(عکس آن لائن) ضلع ملتان کو ڈینگی فری برقرار رکھنے کے لئے کوششیں تیز کر دی گئیں ہیں،اس سلسلہ میں ایڈیشنل ڈپٹی کمشنر ریونیو محمد طیب خان کی زیرصدارت ڈسٹرکٹ ایمرجنسی ریسپانس کمیٹی کا اجلاس ہفتہ کے روزمنعقد ہواجس میں سی ای او ہیلتھ ڈاکٹر ارشد ملک اور 24 سے زائد محکموں کے افسران نے شرکت کی۔اس موقع پرفوکل پرسن ڈاکٹر عطا الرحمان نے ڈینگی سرویلنس بارے بریفنگ دی۔ایڈیشنل ڈپٹی کمشنر طیب خان نے کہا کہ پنجاب میں ڈینگی کے بڑھتے ہوئے کیسسز کے پیش نظر انسداد ڈینگی سر گرمیاں تیز کرنے کی ضرورت ہے،موجود موسم ڈینگی لاروا پنپنے کے لئے انتہائی موافق ہے،ٹینکیوں کے اطراف اور ائرکولرز کے اندر موجود پانی میں ڈینگی لاروا نشونما پا سکتا ہے،ائر کولرز سے پانی کی نکاسی کے لئے عوام میں آگاہی مہم چلائی جائے۔
محمد طیب خان نے10 محکموں کی ڈینگی سرویلنس بارے ناقص کارکردگی کا سخت نوٹس لیا اورناقص کارکردگی دکھانے کے محکموں کے افسران کو شوکاز نوٹس جاری کرنے کا حکم دیتے ہوئے کہا کہ ڈینگی سرویلنس میں غفلت کو نظر انداز نہیں کیا جا سکتا ہے،انسداد ڈینگی اجلاس میں جونیئر افسران کو بھیجنے کی بجائے سینئر افسران خود شرکت کریں۔اجلاس میں شرکت نہ کرنیوالے سینئرفسران بارے چیف سیکرٹری کو لیٹر لکھا جائے گا۔محمد طیب خان نے کہا کہ9 بوگس سرگرمیاں ڈیش بورڈ پر اپ لوڈ کی گئیں ہیں،آئندہ بوگس سرگرمیاں اپ لوڈ کرنیوالے اہلکاروں کو معطل کردیا جائے گا،تمام محکمے اپنے انڈرائیڈ یوزر کی محکمہ صحت سے تربیت کرائیں۔
