لاہور(عکس آن لائن) پنجاب اسمبلی میںقائد حزب اختلاف حمزہ شہباز نے کہا ہے کہ 23 مارچ کے دن برصغیر کے مسلمانوں نے واضح راہ عمل کا تعین کیا اور 7 سال میں اسے حاصل کرلیا ،قائداعظم کی قیادت میں برصغیر کے مسلمانوں نے یقین، اتحاد اور تنظیم کی قوت سے پیارا پاکستان حاصل کیا ۔یوم پاکستان پر اپنے پیغام میں حمزہ شہباز نے کہا کہ اس دن بانی پاکستان حضرت قائد اعظم، علامہ اقبال ، مشاہیر پاکستان اور شہداکو خراج عقیدت پیش کرتے ہیں ،یہ دن ہمیں بتاتا ہے کہ اہل قیادت میسر ہو تو قوم کے اتحاد سے ناممکن بھی ممکن ہوجاتا ہے ،آزادی کی سمت کا تعین ایک تاریخ ساز مرحلہ تھا، ان عظیم قربانیوں کا ثمر آزاد فضائوں کی صورت ہمیں ملا ہے،ایک جدید، فلاحی، اسلامی، خوشحال مملکت کے قیام کا مقصد حاصل کرنے کے لئے اسلاف کی سوچ اور نظریات کو اپنانا ہوگا .
،ہم قرارداد قیام پاکستان کے مقاصد کو تحریک پاکستان کے جذبے اور کردار سے ہی حاصل کرسکتے ہیں ، ہم اپنے آبائواجداد، مشاہیر پاکستان اور شہدا ء کو سلام پیش کرتے ہیں کہ ہم آج آزاد ہیں ۔ انہوں نے کہاکہ پاکستان کے نظریہ، آئین ، قانون اور پارلیمان کی بالادستی کے بابائے قوم کے مشن کو آگے بڑھائیں گے ،عہد کرتے ہیں کہ نوازشریف کی قیادت میں قیام پاکستان کے مقاصد کو حاصل کرکے رہیں گے ، انشااللہ نوازشریف اور شہباز شریف کی قیادت میںپاکستان کو جدید ترقی یافتہ، خوش حال اور غربت سے پاک ملک بنائیں گے۔
