اسلام آباد (عکس آ ن لائن)ملک میں مہنگائی کی شرح میں گزشتہ ہفتے کے دوران ہفتہ واربنیاد پر0.60فیصد کمی ریکارڈکی گئی۔ پاکستان بیوروبرائے شماریات کے اعدادوشمارکے مطابق 13 اپریل کوختم ہونے والے ہفتے میں صارفین کیلئے قیمتوں کاحساس اشاریہ 250.56 پوائنٹ ریکارڈ کیاگیا جوپیوستہ ہفتے کے اختتام پر252.06 پوائنٹ تھا۔
گزشتہ ہفتے روزمرہ استعمال کی 9 اشیا کی قیمتوں میں کمی، 26 کی قیمتوں میں اضافہ اور16 کی قیمتوں میں استحکام رہا، ٹماٹرکی قیمت میں 22.43 فیصد، پیاز 15.85 فیصد، آٹا 2.75 فیصد، لہسن 1.29 فیصد، دال چنا0.82 فیصد، دال مونگ 0.35 فیصد، سرسوں کاتیل 0.09فیصد، سب سے کم ماہوار آمدنی رکھنے والے گروپ کے لئے بجلی کی قیمت میں 4.95 فیصد اور جلانے کی لکڑی کی قیمت میں 0.09 فیصدکی کمی ریکارڈکی گئی،اس کے برعکس آلو کی قیمت میں 8.59 فیصد، ایل پی جی 4.47 فیصد، انڈے 2.65 فیصد، چکن 2.19 فیصد، جارجیٹ 2.10 فیصد، واشنگ سوپ 1.83 فیصد، کیلا1.64 فیصد، دال ماش 1.45 فیصد، گڑ 1.25 فیصد اورپکی بیف کی قیمت میں 1.15فیصدکااضافہ ہوا۔
سب سے کم یعنی 17732 روپے ماہوارآمدنی رکھنے والے گروپ کے لیے قیمتوں کے حساس اشاریہ میں 0.69 فیصدکی کمی ریکارڈکی گئی، 17733 روپے سے22888 روپے، 22889 روپے سے 29517 روپے، 29518 روپے سے 44175 روپے اوراس سے زیادہ ماہوارآمدنی رکھنے والے گروپوں کے لیے قیمتوں کے حساس اشاریہ میں بالترتیب 0.84 فیصد، 0.58 فیصد،0.44 فیصداور0.67 فیصد کمی ریکارڈکی گئی۔ واضح رہے کہ صارفین کے لئے قیمتوں کے حساس اشاریہ کاتعین ملک کے 17 شہروں کی 50 مارکیٹوں میں 51 ضروری اشیاءکی قیمتوں میں ردوبدل کی بنیاد پرکیا جاتا ہے۔
