لاہور (عکس آن لائن) وزیر اعلیٰ پنجاب مریم نواز شریف نے کہا ہے کہ مثبت معاشی عشاریے پاکستان کے لئے بہتر مستقبل کی نوید ہیں،یو اے ای کی جانب سے 10ارب ڈالر کی سرمایہ کاری حکومت پر بیرونی اعتماد کا ناقابل تردید ثبوت ہے۔ انہوں نے اپنے بیان میں کہا کہ الحمدللہ ،پاکستان اور پاکستانی عوام کے لئے اچھے دن آ رہے ہیں، یو اے ای کی جانب سے 10ارب ڈالر کی سرمایہ کاری کے بیان کا خیرمقدم کرتے ہیں، 10ارب ڈالر کی سرمایہ کاری مسلم لیگ (ن) کی حکومت پر بیرونی اعتماد کا ناقابل تردید ثبوت ہے، مثبت معاشی عشاریے پاکستان کیلئے بہتر مستقبل کی نوید ہیں۔ مریم نواز شریف نے کہا کہ پاکستان سٹاک مارکیٹ روز بروز ریکارڈز قائم کر رہی ہے، سٹاک مارکیٹ 100انڈیکس کا مثبت رحجان خوش آئند ہے ۔
روٹی سمیت دیگر اشیا کے نرخ میں مزید کمی ہوگی ،مہنگائی کی شرح میں کمی آئے گی اور پاکستانی کرنسی مستحکم ہوگی۔ انہوں نے کہا کہ مسلم لیگ (ن) کی حکومت کو تاجروں صنعتکاروں اورسرمایہ کاروں کا اعتماد حاصل ہے۔ پاکستان میں فارن ڈائریکٹ انویسٹمنٹ کیلئے شہباز شریف حکومت کی کاوشیں قابل تحسین ہیں۔ انشاللہ مسلم لیگ (ن) کی حکومت میں پاکستان اپنا کھویا ہوا مقام حاصل کرے گا۔ وزیر اعلیٰ مریم نواز شریف نے کہا کہ دعا ہے اللہ تعالی پاکستان کی ترقی میں رکاوٹ ڈالے والے عناصر کے شر سے ملک کو محفوظ رکھے۔حکومت کی پوری توجہ مہنگائی میں کمی لاکر عوام کو ریلیف دینے پر مرکوز ہے۔
