طرابلس(عکس آن لائن)لیبیا کی قومی فوج نے بتایا کہ اس کی فضائیہ نے مصراتہ ایئر فورس کالج اور طرابلس میں معیتیقہ فوجی اڈے پر الوفاق ملیشیا سے وابستہ متعدد ٹھکانوں پر بمباری کی جس کے نتیجے میں وہاں پر ذخیرہ کیے گئے متعدد ڈرون طیارے اور دیگر اسلحہ اور گولہ بارود تباہ ہوگیا۔
لیبی فوج کی طرف سے جاری کردہ بیان میں کہا گیا ہے کہ فضائیہ نے مصراتہ ایئرفورس کالج پر گولہ بارود اور ڈرونز کے گوداموں کو نشانہ بناتے ہوئے تین فضائی حملے کیے۔اس کے علاوہ طرابلس میں قومی وفاق حکومت کے زیرانتظام معیتیقہ اڈے کے ملٹری سیکشن میں ملیشیا کے ایک آپریشن روم کو نشانہ بنایا۔اس اڈے پر موجود ڈرونز، ان کے انفراسٹرکچر، اور میزائلو سمیت دیگر اسلحہ کو 100 فی صد تباہ کردیا گیا۔مصراتہ کا اسٹریٹجک ایئر بیس لیبیا کی قومی وفاق حکومت کے پاس ہے۔
قومی وفاق حکومت اس اڈے کو مختلف آپریشنل کارروائیوں میں استعمال کرنے کے ساتھ ترکی سے لائے گئے اسلحہ اور گولہ بارود کو ذخیرہ کرنے کے لیے بھی استعمال کرتی ہے۔
جنلر خلیفہ حفتر کی زیر کمان قومی فوج نے طرابلس میں مسلح ملیشیا کے خلاف فضائی حملے تیز کردیے ہیں۔ گذشتہ روز طرابلس میں عین زارہ، خلفہ الفرجان اور دیگر مقامات پر بمباری کی۔ اس دوران بری فوج نے بھی اپنی پیش قدمی جاری رکھی ہوئی ہے۔
