اسلام آباد (عکس آن لائن)پاکستان مسلم لیگ (ن)کے رہنما سابق وزیر مملکت طلال چوہدری نے کہا ہے کہ فواد چوہدری کا بیان نوازشریف نہیں پنجاب حکومت کے خلاف ہے، فواد چوہدری نے پنجاب حکومت، یاسمین راشد اور سروسز ہسپتال کے ڈاکٹرز کو جھوٹا اور فراڈ قرار دیا ہے، فواد چوہدری پنجاب حکومت کے ساتھ اپنا ذاتی حساب برابر کرنے کے لئے نوازشریف کے کاندھے پر رکھ کر بندوق نہ چلائیں۔
منگل کو وفاقی وزیر فواد چوہدری کے ٹویٹ پر جواب میں طلال چوہدری نے کہا عدالت کے وضع کردہ طریقہ کار کے مطابق نوازشریف کی تمام میڈیکل رپورٹس جمع کرائی گئیں، ایسے بیانات دے کر فواد چوہدری کا وزیراعلی پنجاب بننے کا ارمان پورا نہیں ہوگا ،پنجاب حکومت کے خلاف بیان کی وجہ بظاہر پی ٹی آئی سے فواد چوہدری کی جلد رخصتی کی نشاندہی ہے ۔ انہوں نے کہا فواد چودھری کے بیان کا ایک مطلب یہ ہے کہ وہ پنجاب حکومت اور بزدار صاحب کو فراڈ اور مشکوک قرار دے رہے ہیں۔ انہوں نے کہا فواد صاحب ایسی تحقیقاتی کمیٹی کا مطالبہ کریں جو معلوم کرے کہ پنجاب کے لوگوں کو مفت دوائی اور علاج پر پابندی کس نے لگائی؟ایسی تحقیقاتی کمیٹی بنائیں جو معلوم کرے کہ ترقی کیوں رک گئی اور لاہور سے کچرا کیوں نہیں اٹھاسکتے؟ ۔
انہوں نے کہاایسی کمیٹی بنائیں جو شہبازشریف کی چار میٹروز اور اورنج ٹرین کے مقابلے میں پشاور میٹرو کے کھڈے ابھی تک نہ بھرنے کی تحقیقات کرے ؟ ایسی کمیٹی بنائیں جو شہبازشریف کے منصوبہ پر تختیاں لگانے والے منصوبوں چوروں کی تحقیقات کرے ایسی کمیٹی بنائیں جو چور کرپٹ حکومت کے عوام سے روٹی، روزگار، کاروبار چھین لینے کی تحقیقات کرے۔
