اسلام آباد(عکس آن لائن)وزیراعظم کی معاون خصوصی برائے اطلاعات ونشریات فردوس عاشق اعوان نے کہا ہے کہ بلاول بھٹو ایک سانس میں جمہوریت کی حمایت تو دوسرے میں مخالفت کرتے ہیں۔ہفتہ کو سماجی رابطے کی ویب سائٹ ٹویٹر پر فردوس عاشق اعوان نے اپنے پیغام میں کہا کہ بلاول! آئندہ سال الیکشن کی بات بی بی شہید کے فلسفے کی نفی ہے، بی بی شہید نے کہا تھا جمہوری حکومتوں کو مدت پوری کرنی چاہیے۔
فردوس عاشق اعوان نے کہا کہ بلاول ایک سانس میں جمہوریت کی حمایت تودوسر ی میں مخالفت کرتے ہیں۔ انہوں نے مزید کہا کہ کشمیر کاز کو نقصان پہنچا کرمارچ کامیاب قرار دینے والوں کی عقل پرماتم ہی کیا جاسکتا ہے۔
یاد رہے کہ گزشتہ روز چیئرمین پیپلزپارٹی بلاول بھٹو نے اسلام آباد میں میڈیا سے گفتگو کرتے ہوئے کہا تھا کہ پیپلزپارٹی نے مارچ سے متعلق اپنے وعدے پورے کیے ہیں لیکن مولانا اور رہبر کمیٹی نے پلان کے بارے میں ہمیں کچھ نہیں بتایا۔بلاول بھٹو کا کہنا تھا کہ پیپلزپارٹی کا ہمیشہ سے موقف رہا ہے کہ مسائل کا حل جمہوریت ہے، پیپلزپارٹی کا مطالبہ ہے کہ نئے الیکشن صاف و شفاف ہوں۔
