لاہور(عکس آن لائن)قومی ٹیم کے دو فاسٹ بولرز اور بیسٹ فرینڈز حارث رئوف اور شاہین شاہ آفریدی کی دلچسپ ویڈیو سامنے آئی ہے جس میں حارث شاہین سے ہونے والے سسر سے متعلق گفتگو کررہے ہیں ۔گزشتہ روز شاہین اور حارث سمیت لاہور قلندرز کی انتظامیہ نے لاہور کی یونیورسٹی آف مینجمنٹ اینڈ ٹیکنالوجی کا دورہ کیا جہاں بولرز نے اپنے مداح طالب علموں سے مزاحیہ گفتگو کی اور سوالات کے جواب دئیے۔ایک مداح نے شاہین سے سوال کیا کہ کرکٹ میں وہ کس سے متاثر ہوئے یا ان کیلئے رول ماڈل(مثالی شخصیت)کون ہے؟جس پرشاہین نے مسکراتے ہوئے جواب دیاکہ کرکٹ میں ہر کسی کا کوئی نا کوئی رول ماڈل ہوتا ہے، میرے بھی ہیں، سب سے پہلے بڑے بھائی ریاض آفریدی اور پھر شاہد آفریدی۔
فاسٹ بولر کے جواب پر جہاں مداحوں نے تالیاں بجائیں اور خوشی سے نعرے لگائے وہیں حارث کو مستی سوجھی۔انہوں نے فوراً شاہین سے مائیک لے کر کہاکہ کوئی اور ہو نا ہو، شاہد آفریدی تو ضرور اس کے رول ماڈل ہیں۔یہ کہتے ہی حارث اور شاہین قہقہہ لگاکر ہنس پڑے جبکہ اسٹیج پر موجود دیگر لوگ بھی ہنسنے لگے۔اس کے علاوہ ایک اور مداح نے شاہین سے ان کے پسندیدہ انٹرنیشنل وکٹ کے بارے میں پوچھا جس پر حارث نے فورا جواب دیا کہ شاہین کی پسندیدہ وکٹ بھارتی بیٹر کے ایل راہول کی تھی۔بعدازاں شاہین نے جواب دیا کہ میں نے ایک مرتبہ سسر جی کو آئوٹ کیا تھا، انہیں آئوٹ کرنے کا احساس بہترین تھاکیونکہ میں نے اپنے رول ماڈل اور ہیرو کو آئوٹ کیا تھا، ہر بندے کا خواب ہوتا ہے کہ اپنے ہیرو کو آئوٹ کرے۔
