کراچی (نمائندہ عکس)متحدہ قومی موومنٹ پاکستان نے وزیراعظم سے پی پی سے معاہدے پر بطور ضمانتی کردار ادا کرنے کا مطالبہ کرتے ہوئے گورنر سندھ کی جلد تقرری اور معاہدے پر عملدرآمد تیز کرنے پر زور دیا ہے جبکہ وفاق کے تحت جاری منصوبوں ، کے فوراورٹرانسپورٹ کے مسائل حل کرنے کی بھی درخواست کی۔تفصیلات کے مطابق وزیراعظم شہباز شریف سے فیصل بیس پر ایم کیو ایم وفد کی ملاقات ہوئی ، ملاقات 45منٹ تک جاری رہی ، ایم کیو ایم کی جانب سے خالد مقبول ،کنورنویدجمیل ، وسیم اختر اور امین الحق شامل تھے۔
وزیراعظم شہبازشریف کے ہمراہ خواجہ سعد رفیق بھی ملاقات کا حصہ تھے ،ذرائع ایم کیو ایم نے بتایا کہ ملاقات خوشگوار ماحول میں ہوئی اور معاہدے پر اب تک ہونے والی پیش رفت کا جائزہ لیا گیا۔دوران ملاقات مردم شماری ، انتخابی اصلاحات سمیت دیگرمعاملات پربھی گفتگو ہوئی جبکہ بلدیاتی انتخابات میں اتحاد ، ورکنگ ریلیشن پر بات چیت کی گئی۔ ایم کیو ایم نے پی پی معاہدے پر بطورضمانتی وزیراعظم سے کردار ادا کرنے کا مطالبہ کرتے ہوئے وفاق کے تحت جاری منصوبوں ،کےفور ، ٹرانسپورٹ مسائل حل کرنے کی درخواست کی۔وزیراعظم نے ایم کیو ایم کے وفد کو شہری سندھ کیلئے ہر وعدے کو پورا کرنے اور وسائل کو بروئے کار لانے کی یقین دہانی کرادی۔
