اسلام آباد(عکس آن لائن) علامہ اقبال اوپن یونیورسٹی نے سمسٹربہار 2019ء میں پیش کئے گئے میٹرک پروگرام کے فائنل امتحانات کے نتائج کا اعلان کردیا ہے۔ کنٹرولر امتحانات ٗ سہیل نذیر رانا کے مطابق میٹرک پروگرام کے نتائج یونیورسٹی کی ویب سائٹ www.aiou.edu.pkپر فراہم کر دئیے گئے ہیں اور رزلٹ کارڈز تمام امیدواروں کو ان کے دئیے گئے پتوں پر ڈاک کے ذریعہ ارسال کئے جارہے ہیں۔
کنٹرولر امتحانات کے مطابق وائس چانسلر ٗ پروفیسر ڈاکٹرضیاء القیوم کی ہدایت پر نتائج کے پراسس کو تیز کردیا گیا ہے ٗ ایف اے پروگرام کے نتائج کا اعلان آئندہ ہفتے متوقع ہے۔ علاوہ ازیں سمسٹر خزاں 2019ء میں داخل لاکھوں طلبہ کو کتابوں کی ترسیل کا عمل جاری ہے ٗ میٹرک اور ایف اے پروگرامز کے طلبہ کو درسی کتب ارسال کرنے کا عمل مکمل ہوچکا ہے ٗ بی اے ٗ بی ایڈ پروگرامز کے طلبہ کو کتب ارسال کئے جارہے ہیں۔
