لاہور(آن لائن )عوامی مسلم لیگ کے سربراہ و سابق وزیر داخلہ شیخ رشید نے کہا ہے کہ ٹیکس اشرافیہ پر لگنا چاہیے تھا لیکن اس کے لے غریبوں کا انتخاب کیا گیا ہے ،
اصل مسئلہ یہ ہے کہ مڈل کلاس مر گئی ہے ،لوگ اپنے بچوں کا پیٹ کیسے پالیں ، پیٹرول کا خرچہ کیسے پورا کریں ، بجلی کا بل کیسے دیں اور دو وقت کی روٹی کیسے کھائیں۔ اپنے بیان میں شیخ رشید نے کہا کہ فاقہ اور مہنگائی جس گھر میں داخل ہوتی ہے یہ نہیں پوچھتی کہ آپ کی پارٹی کونسی ہے ،اب اس ملک میں اشرافیہ ہی اپنی مرضی کی زندگی گزار سکتی ہے غریب کو تو اندھے کنویں میں دھکا دے دیا گیاہے ،
عوام کمائے گی کیا اور کھائے گی کیا اور بچوں کو پڑھائے گی کیا اور مکان کا کرایہ کیسے دے گی ،جب بجلی اور پیٹرول مہنگا ہوگا تو زرعی اور صنعتی انقلاب کیسے آئے گا ۔ انہوں نے کہا کہ ستمبر کے آخری ہفتے سے غریب پر گیس کی ستمگیری بھی شروع ہو جائے گی ،کچھ فیصلے زمینی ہوتے ہیں اور کچھ فیصلے آسمانی ہوتے ہیں اور الیکشن سے پہلے آسمانی فیصلے بھی آ سکتے ہیں ،عام آدمی کی بس ہو گی ہے
اور گلی محلوں میں امن و امان کے مسائل پیدا ہو چکے ہیں ،لوگ لوٹ مار کی طرف بڑھ رہے ہیں جو کہ انتہائی پریشان کن ہے ،الیکشن ہوتے ہیں کب ہوتے ہیں کیسے ہوتے ہیں یہ بعد کی بات ہے ،اب عام آدمی کی بقا ء کا مسئلہ ہے۔
