رام اللہ (عکس آن لائن) اسرائیلی فوج اور پولیس نے غرب اردن کے مختلف شہروں میں فلسطینیوں کے خلاف جاری وحشیانہ کریک ڈاﺅن کے دوران کئی فلسطینیوں کو حراست میں لے لیا ہے،
گرفتار ہونےوالوں میں سابق اسیران، ارکان پارلیمنٹ، حماس کے رہ نما اور یونیورسٹی کے طلباءشامل ہیں۔مقامی فلسطینی ذرائع کے مطابق گزشتہ روز علی الصباح اسرائیلی فوجیوں نے غرب اردن کے مختلف شہروں میں گھر گھرتلاشی کا سلسلہ شروع کیا جس میں متعدد فلسطینیوں کو حراست میں لیا گیا ہے۔
مقامی فلسطینی ذرائع کے مطابق غرب اردن کے جنوبی شہر الخلیل میں اسرائیلی فوج نے پانچ فلسطینی رہنماﺅں کو حراست میں لینے کے بعد نامعلوم مقام پر منتقل کردیا۔قابض فوج نے گھروں میں گھس کر توڑپھوڑ اور لوٹ مار کی اور فلسطینیوں کو زدو کوب کیا گیا۔قابض فوج کے حماس کےخلاف جاری وحشیانہ اور غیر مسبوق کریک ڈاﺅن میں سابق فلسطینی وزیر اور رکن پارلیمنٹ جمال النتشہ، الشیخ جواد محمود بحر النتشہ، الشیخ عمر قواسمی، الشیخ مازن جمال النتشہ کو حراست میں لیا۔ یہ تمام سابق اسیران ہیں۔
شمال مشرقی نابلس میں قائم بلاطہ پناہ گزین کیمپ میں تلاشی کے دوران دو فلسطینیوں محمد خیزراب اور انس علی ابو حمادہ کو حراست میں لے لیا۔قابض حکام نے بیرزیت یونیورسٹی کی طالبات کانفرنس کی چیئرپرسن شذی ماجد حسن کو رام اللہ میں اس کے گھر سے گرفتار کیا جب کہ بیت لحم میں یحییٰ الرفاعی کی گرفتاری عمل میں لائی گئی۔مغربی رام اللہ میں بیت ریما کے مقام پر فلسطینی شہریوں اور اسرائیلی فوج کےدرمیان ہونے والی جھڑپوں میں قابض فوج نے فلسطینیوں کے خلاف آنسوگیس کی شیلنگ کی جس کے نتیجے میں متعدد فلسطینی زخمی ہوگئے۔ادھر القدس شہر میں اسرائیلی فوج نے چھاپہ مار کارروائی کےدوران ابو دیس سے متعدد فلسطینیوں کو گرفتار کیا ہے۔ قابض فوج نے تلاشی کی کارروائی میں بڑے پیمانے پر توڑپھوڑ اور گھروں میں گھس کر لوٹ مار کی۔
