لاہور( عکس آن لائن)قومی ٹیم کے نوجوان فاسٹ بولر احسان اللہ خان کی انجری کی تحقیقات کیلئے پاکستان کرکٹ بورڈ (پی سی بی) نے آزادانہ میڈیکل بورڈ تشکیل دیدیا۔
بورڈ کی جانب سے جاری کردہ اعلامیے کہا گیا ہے کہ احسان اللہ خان کی غلط سرجری سے متعلق تحقیقات کیلئے بورڈ تشکیل دیا گیا ہے، جس میں ڈاکٹر جاوید اکرام، ڈاکٹر دلنواز اور ڈاکٹر ممریز نقشبند شامل ہیں۔
میڈیکل بورڈ پیسر کے علاج اور بحالی کیلئے اپنی تجاویز بھی دے گا۔قبل ازیں پاکستان سپر لیگ (پی ایس ایل) میں معروف فرنچائز ملتان سلطانز کے اونر علی ترین نے الزام عائد کیا تھا کہ فاسٹ بولر احسان اللہ خان کی پی سی بی ڈاکٹر نے غلط تشخیص کی جس کے باعث انکا کیرئیر داؤ پر لگ گیا ہے۔
احسان اللہ خان انجری کے باعث اِن دنوں برطانیہ میں موجود ہیں، جہاں انہیں معروف آرتھوپیڈک سرجن پروفیسر ایڈم واٹس معائنہ کررہے ہیں۔ملتان سلطانز کی فرنچائز نے احسان اللہ کے ڈاکٹر سے اپائنٹمنٹ کے سلسلے میں بورڈ کے ساتھ تعاون کیا ہے۔دوسری جانب پاکستان کرکٹ بورڈ احسان اللہ خان کے علاج اور ری ہیب کے تمام اخراجات برداشت کرے گا۔
