لاہور (عکس آن لائن) پاکستان بیس بال ٹیم رواں برس ایشین گیمز میں حصہ لے گی۔پاکستان بیس بال فیڈریشن کے صدر فخر علی شاہ نے لاہور میں میڈیا سے گفتگو کرتے ہوئے کہا کہ ایشین گیمز میں 12ٹیمیں حصہ لے رہی ہیں، پاکستان ایشیا میں 5ویں نمبر پر ہے اس لیے ٹیم دوسرا رائونڈ کھیلے گی جو کہ یکم اکتوبر سے شروع ہوگا جبکہ پہلا رائونڈ 23ستمبر سے شروع ہو جائے گا۔فخر علی شاہ نے کہا کہ اولمپک چمپئن جاپان ہمارے گروپ میں شامل ہے، ورلڈ نمبر دو تائیوان بھی ایشین گیمز میں ہے، کوویڈ کے بعد انٹرنیشنل ایونٹس کم ملے ہیں اس لیے اپنی پوزیشن کو برقرار رکھنا پہلی کوشش ہوگی۔
انہوں نے کہا کہ پاکستان اسپورٹس بورڈ سے کیمپ لگانے کے لیے رابطے میں ہیں، پی ایس بی نے تاخیر کی تو ہم خود لاہور یا گوجرانوالہ میں کیمپ لگا دیں گے، ہم امریکا سے تعلق رکھنے والے کوچز کی خدمات حاصل کرنے کے لیے کوشاں ہیں۔فخر علی شاہ نے مشیر کھیل وہاب ریاض سے اپیل کی کہ وہ ہمارے گرائونڈ کے لیے کچھ کریں تا کہ کھلاڑی اپنے لیے مخصوص گرائونڈ میں اچھے انداز میں ٹریننگ کر سکیں۔
