مکہ مکرمہ(عکس آن لائن) مکہ مکرمہ میں مسجد الحرام کی تاریخ میں پہلی مرتبہ عشا کی اذان ایک موذن کے بجائے دوموذنوں نے مکمل کی ہے۔ مسجد الحرام کے سینیئر موذن علی الملا عشاکی اذان دے رہے تھے کہ اچانک ان کی طبیعت ناساز ہوگئی فورا ہی معاون موذن نے مائیک سنبھالا اور ان کی جگہ عشا کی اذان مکمل کی۔
سعودی میڈیا کے مطابق مسجد الحرام میں اذان کے مقررہ نظام کے مطابق ہر فرض نماز کے لیے دو موذن ڈیوٹی پر ہوتے ہیں۔ یہ انتظام اس وجہ سے کیا جاتا ہے تاکہ خدانخواستہ کوئی ایک موذن کسی وجہ سے بروقت نہ پہنچ سکے یا اذان دیتے وقت کوئی مشکل پیش آجائے تو ایسی صورت میں متبادل موذن اس کی جگہ سنبھال سکے۔سعودی میڈیاپر موذن حرم شیخ علی الملا کا وڈیو کلپ بھی جاری کردیا گیا ہے جسے دیکھ کر اندازہ لگا سکتے ہیں کہ علی الملا کی آواز اذان دیتے ہوئے دبی ہوئی ہے۔اچانک طبیعت خراب ہوجانے پر یہ صورتحال پیش آگئی تھی۔ فورا ہی ان کی جگہ دوسرے موذن حرم شیخ ہاشم السقاف نے اذان مکمل کی۔مسجد الحرام میں اذان کا مخصوص نظام ہے۔ اسکے لیے انجینیئرز اور دفتری کارکن تعینات ہیں۔ حرم مکی میں اذان کے لیے 24افراد تعینات ہیں۔
