اسلام آباد(عکس آن لائن) علامہ اقبال اوپن یونیورسٹی کے سمسٹربہار 2019ء کے بی اے پروگرامز کے فائنل امتحانات آج پیر سے ملک بھر میں ایک ساتھ شروع ہوں گے ۔ڈیٹ شیٹ اور رول نمبر سلپس یونیورسٹی کی ویب سائٹ پر دستیاب ہیں۔طلبہ و طالبات کو رول نمبر سلپس ڈاک کے ذریعہ بھی ارسال کی جاچکی ہیں۔وائس چانسلر ٗ پروفیسر ڈاکٹرضیاء القیوم کی خصوصی ہدایت پر طلبہ کو قریب ترین مقامات پر امتحانات میں شرکت کی سہولت فراہم کرنے کے لئے شعبہ امتحانات نے ضلع اور تحصیل سطح پر 850۔ امتحانی مراکز قائم کردئیے ہیں۔
وائس چانسلر کی واضح احکامات پرامتحانات کے نظام کی شفافیت کو یقینی بنانے کے لئے امتحانی مراکز میں سخت نگرانی کا نظام بھی نافذ کردیا گیا ہے اور اس ضمن میں خصوصی ٹیمیں تشکیل دے دی گئی ہیں۔ امتحانی مراکز میں طلبہ کو ہر قسم کی ضروری سہولتیں فراہم کی جائیں گی ۔ کنٹرولر امتحانات کے مطابق ویب سائٹ سے ڈاؤن لوڈ شدہ رول نمبر سلپ بھی امتحان میں شرکت کے لئے قابل قبول ہوگی۔نئے نظام کے تحت ٗ ہر طالب علم کے ایک سمسٹر کے سب پیپرزکے امتحانات اب ایک ہی سنٹر میں ہوں گے ٗ قبل ازیں مختلف کورسسز کے لئے مختلف سنٹرز الاٹ کئے جاتے تھے جس کی وجہ سے طلبہ کو دشواریوں کا سامنا کرنا پڑتا تھا اور یونیورسٹی کو شکایات ملتی رہتی تھی ۔
