فیصل آباد (عکس آن لائن)محکمہ زراعت نے کاشتکاروں کو بینگن کی پنیری کو مختلف بیماریوں سے محفوظ رکھنے کیلئے فوری اقدامات کی ہدایت کی ہے اور کہاہے کہ شدید موسم سرما، دھند،سموگ اورکورے کے باعث بینگن کی پنیری پر تنے کے گلا کی بیماری کا حملہ ہو سکتاہے جو پودوں کو نقصان پہنچاسکتی ہے لہذا کاشتکار پنیری پر گہری نظر رکھیں اور تنے کے گلا کی بیماری کے حملہ کی ابتدائی علامات ظاہر ہوتے ہی اس کے تدارک کیلئے اقدامات کو یقینی بنائیں تاکہ دیگر پودوں میں اس بیماری کے پھیلا کو روکا جاسکے۔
ڈپٹی ڈائریکٹر پلانٹ پروٹیکشن،پیسٹ وارننگ اینڈ کوالٹی کنٹرول آف پیسٹی سائیڈزمحکمہ زراعت فیصل آباد ڈاکٹر عامر رسول نے کہا کہ بیماری کے جراثیم جڑ سے اوپر زمین کے قریب تنے پر حملہ آور ہوتے ہیں جس سے تنے پر پہلے ہلکا سیاہ یا بھورا نشان بنتاہے جو بعد ازاں پھیل کر دائرے کی شکل اختیار کرلیتاہے۔ انہوں نے بتایاکہ اس بیماری سے پودے کو خوراک کی ترسیل رک جاتی ہے اور پودے مرجھا جاتے ہیں اس طرح کاشتکاروں کو بھاری مالی نقصان کا سامنا کرناپڑ سکتا ہے۔ انہوں نے کہاکہ کاشتکار اس ضمن میں مزید رہنمائی کیلئے ماہرین زراعت یا محکمہ زراعت کے فیلڈ سٹاف کی خدمات سے بھی استفادہ کرسکتے ہیں۔
