اسلام آباد(عکس آن لائن ) سابق وزیراعظم شاہد خاقان عباسی نے کہا ہے کہ چئیرمین نیب میں شرم و حیا ہے تو ایل این جی کا جعلی کیس ختم کریں، ایل این جی کیس میں تو حکومتی گواہ کہہ رہا ہے کوئی نقصان حکومت کا نہیں ہوا، اسی گواہ سے پوچھا گیا کہ کرپشن کا الزام ہے اس نے جواب دیا کوئی کرپشن کا الزام نہیں ہے جب کہ اسٹیٹ بینک نے 32 صفحات پر ایل این جی سیکٹر کی سپیشل رپورٹ دی ہے، تین سال میں اس ٹرمینل کی وجہ سے ملک کو234 ارب روپے بچے، جس کا کیس ہم پر چل رہا ہے اس ٹرمینل نے 234 ارب روپے محفوظ کیے۔
میڈیا سے گفتگو کرتے ہوئے سابق وزیراعظم شاہد خاقان عباسی نے کہا کہ امید ہے چئیرمین نیب کو رپورٹ جاتی ہو گی اگر ان میں شرم حیا ہے تو یہ جعلی کیس ختم کریں، چئیرمین نیب ابھی ملازمت میں توسیع کے لیے ہاتھ پاں مار رہے ہیں اور عمران خان ان کی ملازمت میں توسیع کریں گے۔ ان کا کہنا تھا کہ جھوٹ کا یہ عالم ہے کہ وفاقی وزیر جھوٹ بول کر چلے جاتے ہیں، اگر وفاقی وزیر کو بجٹ کا معلوم نہیں تھا تو پاس کیسے ہوا، بجٹ میں مہنگائی کم کرنے کے لیے کوئی اقدامات نہیں کیے گئے ہیں۔
