کراچی(عکس آن لائن ) وزیر اطلاعات سندھ ناصرحسین شاہ نے کہا ہے کہ گورنر راج کی بات کرنا فواد چودھری کی ذہنی پسماندگی کا عکاس ہے، پی ٹی آئی حکومت کو آئین، قانون اور جمہوری روایات کا کچھ پتا نہیں۔
ناصر حسین شاہ کا اپنے بیان میں کہا کہ سندھ میں بلدیاتی اداروں نے اپنی مدت مکمل کی اور نئے انتخابات کیلئے کام شروع ہوچکا ہے، پی ٹی آئی حکومت نے بلدیاتی اداروں کو وقت سے پہلے تحلیل کر دیا، پنجاب میں عدالت کے حکم پر بلدیاتی ادارے بحال کئے گئے، اس کے باوجود پی ٹی آئی حکومت پنجاب میں بلدیاتی اداروں کو کام کرنے نہیں دے رہی، فواد چودھری کس مونہ سے سندھ میں بلدیاتی اداروں کو فعال کرنے کی بات کر رہے ہیں۔ ناصر شاہ نے کہا کہ خورشید شاہ کے بیٹے کی گرفتاری قابل مذمت ہے۔
