لاہور (آئی این پی ) وزیراعلی پنجاب چودھری پرویز الہی نے کہا ہے کہ پنجاب حکومت سیلاب متاثرین کی جلد بحالی کیلئے کوشاں ہے۔ تفصیلات کے مطابق وزیراعلی پنجاب چودھری پرویز الہی سے سابق سپیکر پنجاب اسمبلی چودھری محمد افضل ساہی کی ملاقات ہوئی ہے۔ ملاقات میں باہمی دلچسپی کے امور اور متاثرین سیلاب کی بحالی و آبادکاری کے حوالے سے تبادلہ خیال کیا گیا۔ اس موقع پر وزیراعلی پنجاب چودھری پرویز الہی کا کہنا تھا کہ پنجاب حکومت سیلاب متاثرین کی جلد بحالی کیلئے کوشاں ہے۔
انہوں نے کہا کہ مخیر حضرات وزیراعلی فلڈ ریلیف فنڈ میں رقوم جمع کروا رہے ہیں، سیلاب متاثرین کی بحالی میں حصہ لینے والے مخیر حضرات کے جذبے کی قدر کرتے ہیں۔ چودھری پرویز الہی نے کہا کہ سیلاب متاثرہ علاقوں میں وبائی امراض کی روک تھام اور طبی سہولتوں کی فراہمی کیلئے میڈیکل کیمپس لگائے گئے ہیں، میڈیکل ٹیمیں متاثرین سیلاب کے علاج معالجے کیلئے موجود ہیں۔ انہوں نے کہا کہ میڈیکل ٹیمیں متاثرین سیلاب کے علاج معالجے کیلئے موجود ہیں جبکہ پنجاب حکومت نے ملکی یکجہتی کے فروغ کیلئے میڈیکل ریلیف مشن بلوچستان اور سندھ بھی روانہ کیا ہے۔
چودھری پرویز الہی کا کہنا تھا کہ میڈیکل ریلیف مشن ڈاکٹرز، پیرا میڈیکل سٹاف، ادویات اور امدادی سامان پر مشتمل ہے۔ انہوں نے مزید کہا کہ سیلاب زدگان کیلئے 9 ٹرک بھیجے گئے ہیں جن میں ادویات، راشن اور دیگر امدادی سامان شامل ہے۔
