اسلام آباد(عکس آن لائن)وفاقی وزیر داخلہ محسن نقوی نے کہا ہے کہ بشام واقعہ پاک چین دوستی پر حملہ تھا،ملوث عناصر کو ہر صورت عبرتناک انجام تک پہنچائیں گے ،پاکستان بھر میں چینی شہریوں کی سکیورٹی کے لئے نئے ایس او پیز بنا ئے گئے ہیں ، ایس او پیز پر سختی سے عملدرآمد یقینی بنایا جا رہا ہے ۔ان خیالات کا اظہار انہوں نے چین کے سفیر جیانگ زی ڈونگ سے ملاقات کے دوران کیا ۔
چینی سفیرنے جمعرات کو وزارت داخلہ کا دورہ کیا جہاں وفاقی وزیرداخلہ محسن نقوی نے چینی سفیر کا خیرمقدم کیا وفاقی وزیر داخلہ محسن نقوی سے چینی سفیر کی ملاقات میں وزیر اعظم پاکستان کے دورہ چین کی تیاریوں کے حوالے سے بات چیت کی گئی ۔جبکہ پاکستان بھر میں چینی شہریوں کی سکیورٹی اور بشام واقعہ پر ہونے والی پیش رفت پر بھی گفتگو کی گئی۔ چین کے سفیر نے وزارت داخلہ کا قلمدان سنبھالنے پر محسن نقوی کو مبارکباد پیش کی۔ اس موقع پر وفاقی وزیر داخلہ محسن نقوی نے کہا لاہور اور کراچی میں چینی قونصلیٹ کا دورہ کیا اور قونصل جنرلز سے ملاقات کی۔ چینی قونصل جنرلز نے چینی شہریوں کی سکیورٹی کے اقدامات پر اطمینان کا اظہار کیا۔ انہوں نے کہا پاک چین دوستی کو سبوتاژ کرنے کوئی سازش کامیاب نہیں ہونے دیں گے۔پاکستان اور چین کے درمیان برادرانہ تعلقات دہائیوں پر محیط ہے اور دشمن ان مضبوط تعلقات میں دارڑ نہیں ڈال سکتا ۔ وفاقی سیکرٹری داخلہ خرم آغا ، چین کے سفارت خانے کے اعلی حکام اور متعلقہ افسران بھی اس موقع پر موجود تھے۔
