اسلام آباد /کراچی (عکس آن لائن)اسلام آباد یونائیٹڈ کے کوچ مائیک ہیسن نے کہا ہے کہ پاکستان میں کرکٹ کے ٹیلنٹ سے بہت متاثر ہوا، پاور ہٹنگ میں تھوڑا اور محنت کرنے کی ضرورت ہے۔
ایک انٹرویومیں مائیک ہیسن نے کہا کہ پی ایس ایل میں کوچنگ کا تجربہ کافی انجوائے کر رہا ہوں۔انہوں نے کہا کہ نوجوان کرکٹرز کے ساتھ ایسے سینئرز بھی ہیں جو خود کو بہتر کرنا چاہتے ہیں۔ٹیم کی کامیابی کے بارے میں بات کرتے ہوئے انہوںنے کہاکہ اسلام آباد یونائیٹڈ کی کامیابی کا راز ٹیلنٹ کو زیادہ سے زیادہ استعمال کرنا ہے۔
مائیک ہیسن نے کہا کہ ہماری ٹیم میں کئی ایسے کھلاڑی ہیں جو ٹی ٹوئنٹی کی ضروریات پوری کرسکتے ہیں،ہمارے لیے اہم یہ ہے کہ کون سا کھلاڑی ٹیم کے کام آسکتا ہے۔انہوں نے کہا کہ ہر پلیئر کی جسامت مختلف طرح کی ہوتی ہے، میرے لیے اہم یہ ہے کہ پلیئر ٹیم کیلیے کیا کردار ادا کر رہا ہے۔
مائیک ہیسن نے کہا کہ اعظم خان اسپن اور فاسٹ دونوں طرح کی بولنگ پر اٹیک کرسکتا ہے، اعظم خان ایک اسپیشل ٹیلنٹ ہے۔اسلام آباد یونائیٹڈ کے کوچ نے کہا کہ اعظم خان میں جو صلاحیت ہیں وہ بہت کم لوگوں کے پاس ہیں، ابھی اعظم پر اور کام کرنا ہے، وہ اب بھی ایک مکمل پراڈکٹ نہیں۔
انہوںنے کہاکہ اگر اعظم جیسا بیٹر اور تسلسل سے کھیلے تو دنیا کی ہر ٹیم اسے پک کرے گی۔مائیک ہیسن نے کہا کہ پاکستان میں کرکٹ کے ٹیلنٹ سے میں بہت متاثر ہوا ہوں، پی ایس ایل میں اسپن بولنگ اٹیک کافی زبردست ہے۔انہوں نے کہا کہ پاوور ہٹر میں پاکستان کو تھوڑا اور محنت کرنے کی ضرورت ہے۔
