اسلا م آباد (عکس آن لائن)وزیرخارجہ مخدوم شاہ محمود قریشی نے کہا ہے کہ پاکستان افغانستان میں دیرپا امن و استحکام کا خواہاں ہے ،پاکستان نے افغان امن عمل میں مصالحانہ کردار، خلوص نیت سے ادا کیا اور کرتا رہے گا،بھارت، اپنی ریاستی دہشتگردی کے ذریعے پورے خطے کے امن کو تہہ و بالا کرنا چاہتا ہے، ای یو ڈس انفولیب کی رپورٹ نے بھارت کے مذموم عزائم کو مزید بے نقاب کیا ۔بدھ کو وزیر خارجہ مخدوم شاہ محمود قریشی نے یورپی یونین سفرا کے اعزاز میں وزارتِ خارجہ میں ظہرانہ دیا ۔وزیر خارجہ کی دعوت پر 18سفرا وزارت خارجہ تشریف لائے۔وزیر خارجہ نے بطور سفیر نئی ذمہ داریاں سنبھالنے والے سفرا کو مبارکباد دی ۔وزیر خارجہ نے کہا کہ کرونا عالمی وبائی چیلنج کے دوران یورپی یونین کی معاونت پر شکریہ ادا کرتا ہوں ۔
انہوں نے کہا کہ کرونا عالمی وبائی چیلنج کے معاشی مضمرات سے نمٹنے اور ترقی پذیر ممالک کی معاشی بحالی کیلئے وزیر اعظم عمران خان نے قرضوں میں سہولت کی تجویز دی جسے عالمی سطح پر سراہا گیا۔شا ہ محمود قریشی نے کہا کہ محدود وسائل کے باوجود کرونا وبائی چیلنج سے نمٹنے کیلئے ہم نے ”سمارٹ لاک ڈان”کی حکمت عملی اپنائی جس سے اس وبا پر قابو پانے میں خاصی مدد ملی ۔مجھے یہ بتاتے ہوئے خوشی محسوس ہو رہی ہے کہ ہماری معاشی سرگرمیاں مکمل طور پر بحال ہو چکی ہیں ،وبائی صورتحال کے باوجود ہماری برآمدات میں خاطر خواہ اضافہ ہوا ہے ، ہمارے معاشی اعشاریے بہتری کی نوید سنا رہے ہیں ،اسٹیٹ بینک اور ہمارے اقتصادی اداروں نے بہترین کارکردگی کا مظاہرہ کیا ۔وزیر خارجہ نے کہا کہ پاکستان اور یورپی یونین کے مابین، کثیرالجہتی شعبہ جات میں تعاون کے فروغ کے حوالے سے جون 2019میں اسٹریٹیجک انگیجمنٹ پلان پر دستخط ہوئے ۔
انہوں نے کہا کہ کرونا وبا کے دنوں میں میرا بہت سے یورپی ممالک کے ہم منصبین کے ساتھ ٹیلیفونک رابطہ رہا ۔انہو ں نے کہا کہ جی ایس پی پلس اسٹیٹس کے حوالے سے یورپی یونین کی معاونت کے شکرگزار ہیں ۔وزیر خارجہ نے کہا کہ ہم یورپی ممالک کے ساتھ مختلف شعبہ جات میں دو طرفہ اقتصادی تعاون کے فروغ کیلئے کوشاں ہیں ۔انہوں نے کہا کہ پاکستان افغانستان میں دیرپا امن و استحکام کا خواہاں ہے ،پاکستان نے افغان امن عمل میں مصالحانہ کردار، خلوص نیت سے ادا کیا اور کرتا رہے گا ۔انہوں نے کہا کہ پاکستان پچھلی چار دہائیوں سے افغان مہاجرین کی میزبانی کر رہا ہے،ہم ان افغان مہاجرین کی پروقار اور باعزت وطن واپسی کے خواہشمند ہیں ،ہم ہمسایہ ممالک کے ساتھ برابری کی سطح پر دو طرفہ تعلقات چاہتے ہیں ۔
شاہ محمود قریشی نے کہا کہ بھارت، اپنی ریاستی دہشت گردی کے ذریعے پورے خطے کے امن کو تہہ و بالا کرنا چاہتا ہے ۔ہم نے دہشتگردوں کی معاونت کے ناقابل تردید ثبوت ڈوزئیر کے ذریعے دنیا کے سامنے رکھے ۔انہو ں نے کہا کہ ای یو ڈس انفولیب کی رپورٹ نے بھارت کے مذموم عزائم کو مزید بے نقاب کیا ۔انہوں نے کہا کہ پلوامہ واقعہ کی حقیقت اب دنیا کے سامنے آ چکی ہے ۔وزیر خارجہ نے یورپی یونین سفرا کو وزارتِ خارجہ آمد پر خوش آمدید کہا۔
