اسلام آباد(عکس آن لائن)وزیراعظم شہباز شریف نے سپریم کورٹ کے ازخود نوٹس پر تشکیل بنچ پر تحفظات کا اظہار کیا ہے۔نجی ٹی وی کے مطابق جمعرات کووزیر اعظم شہباز شریف کی زیر صدارت پارٹی رہنمائوں کا اجلاس ہواجس میں سپریم کورٹ کے از خود نوٹس کا جائزہ لیا گیا۔ اجلاس میں وزیر اعظم نے صدر کو خط لکھنے سے متعلق پارٹی کے قانونی مشیروں سے مشاورت کی۔ذرائع کے مطابق اجلاس میں صدر کی جانب سے انتخابات کی تاریخ دینے کے اعلان کو غیر آئینی قرار دیا گیا۔اجلاس میں وزیر اعظم نے سپریم کورٹ کے ازخود نوٹس پر بنچ کی تشکیل پر اتحادیوں سے مشاورت کا فیصلہ کیا گیا ۔
وزیر اعظم حکومتی اتحادی اور پی ڈی ایم میں شامل جماعتوں کو اعتماد میں لیں گے، پنجاب اور خیبر پختونخوا میں انتخابات کے انعقاد پر بھی مشاورت ہوگی، ملکی امن و امان سے متعلق اے پی سی کے انعقاد سے متعلق امور پر بھی بات چیت ہوگی۔اس موقع پر وزیر اعظم نے کہاکہ الیکشن کمیشن خود مختار ادارہ ہے، وزیر اعظم انتخاب کی تاریخ کا اعلان الیکشن کمیشن کا اختیار ہے، جیل بھرو تحریک ناکام ہوگئی،عوام نے پی ٹی آئی کی انتشاری سیاست مسترد کردی۔
