فیصل آباد (عکس آن لائن)محکمہ ماہی پروری کے ترجمان نے بتایا کہ حکومت مچھلی پال حضرات کو تمام ممکن سہولیات کی فراہمی کیلئے بھرپور اقدامات کررہی ہے تاکہ یہ افراد مچھلی کا زیادہ سے زیادہ گوشت پیداکرکے ملکی ضروریات میں معاون ثابت ہو سکیں۔
انہوں نے بتایاکہ مچھلی کاگوشت زود ہضم ہونے کے ساتھ ساتھ شوگر اور دل کے امراض کے مریضوں کیلئے انتہائی مفید ہے۔انہوں نے کہاکہ خوشحال پاکستان کیلئے محنتی کسانوں اور مویشی پال افراد کیساتھ ساتھ مچھلی پال حضرات کی کاوشیں لائق تحسین ہیں لیکن روائتی ذرائع پر انحصارکے باعث وہ اپنی آمدنی میں اضافہ نہیں کر پارہے۔
انہوں نے بتایاکہ محکمہ نے فیصل ٓباد ڈویژن کے چاروں اضلاع فیصل ٓباد، جھنگ، ٹوبہ ٹیک سنگھ، چنیوٹ کے فش فارمرز کیلئے مختلف سہولیات اور تکنیکی مشاورت کاآغاز کردیاہے جس کے باعث مچھلی فارموں سے زیادہ سے زیادہ مچھلی کی پیداوار حاصل کی جاسکے گی۔ انہوں نے کہاکہ ایسی بیکار، بنجر،کلراٹھی، ناقابل کاشت زمینیں جو کسی استعمال میں نہیں وہاں محکمانہ سفارشات کے تحت مچھلی فارم بنا کر اپنی آمدنی میں اضافہ کیاجاسکتاہے۔ انہوں نے کہاکہ اس ضمن میں محکمہ کی ویب سائٹ www.punjabfisheries.gov.pk سے بھی معاونت حاصل کی جاسکتی ہے۔