کراچی(عکس آن لائن)مصالحوں کو بھی مہنگائی کا تڑکا لگ گیا، خشک مصالحہ جات عوام کی پہنچ سے دور ہوگئے۔
سبزیاں، دالیں یا مرغن پکوان بننے آسان نہ رہے، خشک مصالحہ جات ہر ہنڈیا کا لازمی جز لیکن مہنگائی نے اس بنیادی ضرورت کو بھی قوت خرید سے باہر کر دیا۔خشک مصالحہ جات میں گرم مصالحہ مکس 2000 روپے کلو پر جا پہنچا، سرخ مرچ 540 روپے، خشک دھنیا پاڈر 570 روپے کلو جبکہ سبزالائچی 6 ہزار روپے میں فروخت ہونے لگی۔
اسی طرح زیرہ 1800 روپے، کالی مرچ ساڑھے 1600، دارچینی 900 روپے، بڑی الائچی 6 ہزار 400 روپے، لونگ ساڑھے 3 ہزار روپے، اجوائن 380 روپے، تیز پتہ 650 روپے اور ہلدی 890 روپے کلو تک بک رہی۔شہریوں نے بتایا کہ مصالحہ جات کی قیمتیں بھی آسمان پر پہنچ گئی ہیں،
خریداری کے لیے آئی ایک خاتون نے بتایاکہ گھر کی ضرورت کیلئے چند مصالحے خریدے ہیں اور10 ہزار روپے بل بن گیا ہے، یہی سامان پہلے 3 سے 4 ہزار روپے میں مل جاتا تھا اب مسلسل مہنگا ہو کر 10 ہزار تک پہنچ گیا ہے۔
