کراچی(نمائندہ عکس ) سندھ ہائیکورٹ نے لاپتا افراد کیسز میں اہل خانہ کی کفالت سے متعلق درخواست پر وفاقی حکومت کو نوٹس جاری کرتے ہوئے 24 اگست تک جواب طلب کرلیا ۔ تفصیلات کے مطابق عدالت عالیہ میں لاپتا افراد کیسز میں اہل خانہ کی کفالت سے متعلق درخواست کی سماعت ہوئی، جس میں درخواست گزار کے وکیل سعادت یار خان ایڈووکیٹ نے مقف دیا کہ عدالت اس سے پہلے گمشدہ شہریوں کے اہل خانہ کی کفالت کا حکم دے چکی ہے۔
دوران سماعت عدالت نے استفسار کیا کہ کیا لاپتا شہری سرکاری ملازم ہے۔ ضروریات ہر شہری کی ایک جیسی ہیں، آئینی حقوق مساوی ہیں۔وکیل نے عدلت کو بتایا کہ درخواست گزار کے شوہر دینی مدرسے کے ملازم تھے۔ سرکاری اہل کاروں نے فروری میں گلشن اقبال سے اغوا کیا۔ جبری گمشدگی کی ایف آئی آر درج ہوچکی ہے۔ بازیابی تک کفالت کا حکم دیا جائے۔ درخواست گزار کی 5 بیٹیاں اور ایک بیٹا ہے۔ عدالت نے لاپتا افراد کے اہل خانہ کی کفالت سے متعلق درخواست پر وفاقی حکومت کو 24 اگست کے لیے نوٹس جاری کرتے ہوئے جواب طلب کرلیا۔
