عوام کا ووٹ بڑی طاقت ہے ، اس سے ہی مستقبل کا فیصلہ ہونا ہے ‘ ثناء

لاہور(عکس آن لائن)نامور اداکارہ ثناء نے کہا ہے کہ عوام کا ووٹ بڑی طاقت ہے اور جمہوری معاشروں میں اس سے ہی مستقبل کا فیصلہ ہوتا ہے ،میڈیا نے معاشرے میں بہت شعور بیدا ر کیا ہے اور موجودہ حالات میں ویسے بھی ہمارے پاس غلطی کی کوئی گنجائش نہیں ۔ خصوصی گفتگو کرتے ہوئے ثناء نے کہا کہ ہمارے دیہی علاقوں میں آج بھی لوگ ذات برادریوں کے نام پر ووٹ دیتے ہیں اور پھر اپنی قسمت کو روتے ہیں ۔

ووٹ سے نہ صرف ہمارا بلکہ ہمارے ملک کا مستقبل وابستہ ہے لہٰذا اس کا سوچ سمجھ کر درست استعمال کرنا چاہیے ۔ انہوں نے کہا کہ عوام پڑھے لکھے امیدواروں کو بطور نمائندہ اسمبلیوں میں پہنچائیں تاکہ قانون سازی کے ساتھ ہمارے مسائل حل ہو سکیں ۔کوشش ہونی چاہیے ہر شعبے کا نمائندہ اسمبلی میں پہنچے تاکہ اس شعبے کے دیرینہ مسائل حل ہو سکیں ۔انہوںنے کہاکہ حکومت کو تعلیم کے میدان میں ایمر جنسی کا نفاذ کرنا چاہیے ۔