لاہور( عکس آن لائن)سابق وزیراعلیٰ پنجاب چودھری پرویزالٰہی نے مسلم لیگی رہنما میاں اسد منیر کے صاحبزادے کی شادی میں شرکت کی۔ شادی کی تقریب میں سابق چیف جسٹس آف پاکستان ثاقب نثار، میاں منیر اور دیگر رہنما شریک تھے۔ اس موقع پر میڈیا سے گفتگو کرتے ہوئے چودھری پرویزالٰہی نے کہا کہ پنجاب میں الیکشن کا بگل بج چکا ہے، انتخاب بارے آئین اور قانون کے مطابق عدالت کا فیصلہ آ چکا ہے، الیکشن کمیشن فوری انتخابی شیڈول کا اعلان کرے۔ انہوں نے کہا کہ عمران خان کی مقبولیت ہر دن میں بڑھتی ہی جا رہی ہے، عمران خان کے الیکشن مہم پر نکلتے ہی مخالفین گیدڑ کی طرح بھاگتے نظر آئیں گے، ن لیگ آئین سے کھیلنے سے باز رہے،
آئین سے انحراف کی کوشش کے سنگین نتائج ہوں گے، ہر ادارہ مقررہ وقت میں انتخاب کے انعقاد کیلئے الیکشن کمیشن کی معاونت کا پابند ہے۔ چودھری پرویزالٰہی نے کہا کہ پی ڈی ایم عوام پر مہنگائی کے جو کوڑے برسا رہی ہے عوام الیکشن میں اس کا بدلہ چکانے کیلئے تیار بیٹھے ہیں، نوازشریف اب واپس نہیں آئیں گے، ن لیگ نے کارکنوں کو لاروں پر لگایا ہوا ہے، ن لیگ الیکشن سے خوفزدہ نہیں تو پھر حیلے بہانے کیوں، ن لیگ کا گورنر پنجاب الیکشن کی تاریخ دینے سے کیوں گریزاں ہے، قوم دیکھ رہی ہے کہ تیرہ جماعتی اتحاد کس طرح الیکشن سے بھاگ رہا ہے، پی ڈی ایم کی حکومت نے ملک اور قوم کو معاشی تباہی کے سوا کچھ نہیں دیا، شہباز شریف کی نااہلی نے عوام کو مہنگائی اور دیگر مالی مشکلات سے دوچار کیا۔
