لاہور (نمائندہ عکس) اسپیکر پنجاب اسمبلی چوہدری پرویز الہی نے کہا ہے کہ جلد از جلد الیکشن کی تاریخ کا اعلان کریں،عمران خان نے حکومت کو کچھ دن کی مہلت دی ہے ۔تفصیلات کے مطابق چوہدری پرویز الہی سے پاکستان تحریک انصاف کے ارکان پنجاب اسمبلی کے وفد کی ملاقات ہوئی، وفد میں خیال احمد کاسترو، اصغر علی سردار، زینب عمیر، شمسہ علی خان اور طلعت فاطمہ نقوی ایڈووکیٹ شامل تھیں۔
اس موقع پر چوہدری پرویز الہی نے کہا کہ ملک کی سیاست اہم موڑ پر حکومت نام کی کوئی چیز موجود نہیں، عمران خان نے حکومت کو کچھ دن کی مہلت دی ہے، جلد از جلد الیکشن کی تاریخ کا اعلان کریں۔ ان کا کہنا تھا کہ حکمران اقتدار کے نشے میں چادر اور چار دیواری کے تقدس کو پامال کر رہے ہیں، سانحہ ماڈل ٹاون کے مرکزی کرداروں کو سزا دی ہوتی تو آج یہ واقعہ رونما نہ ہوتا، ہم نے ہمیشہ عوامی فلاحی منصوبے شروع کیے، 1122 پنجاب میں بھر پور مخالفت کے باوجود کامیابی سے جارہی ہے۔
انہوں نے کہا کہ آج یہ سروس سندھ حکومت نے بھی شروع کی ان کا شکریہ، حقیقی آزادی مارچ کی کامیابی کا بڑا ثبوت اور کیا ہو گا کہ ابھی اعلان ہوا نہیں جعلی حکومت نے ایک بار پھر شہروں کے داخلی و خارجی راستوں پر ابھی سے کنٹینر لگا کر بند کنا شروع کر دئیے ہیں۔ چوہدری پرویز الہی کا کہنا تھا کہ امپورٹڈ حکمران اقتدار کے نشے میں چادر اور چار دیواری کا تقدس پامال کر رہے ہیں، لانگ مارچ کے دوران بچوں، بزرگوں اور عورتوں پر لاٹھی چارج اور آنسو گیس کی شیلنگ کر کے ن لیگ کی حکومت نے سانحہ ماڈل ٹان کو دہرایا ہے۔ اسپیکر پنجاب اسمبلی چوہدری پرویز الہی نے مزید کہا کہ اگر اسی وقت سانحہ ماڈل ٹان کے مرکزی کرداروں کو سزا دی جاتی تو آج یہ واقعات رونما نہ ہوتے۔
